Багарихьди Мягьячгъалайиъ Расул Гьямзатовдин ччвурнахъ хъайи Милли библиотекайиъ АНЖИ-ЭКСПО выставкйир гъахру центри регионарин арайиъ тешкил дапIнайи «Транспорт. Логистика. Связь 2019» ччвур али выставка гъябгъиди.
Выставкйир гъахру АНЖИ-ЭКСПО-йин генеральный директор Мукаил Исмяиловдин гафариинди, му жюрейин выставка гъабхбан асас метлеб республикайин транспортдин комплекс артмиш апIбан гележег хъайи цирклариз асас фикир тувувал, республикайин аьтрафарилан тина шей’ар гъахувал артухъ, транспортдихъди аьлакьалу ляхнарин хатIасузвал за апIувал, транспортдин цирклиз инвестицйир жалб апIувал ву.
«Гьамусяаьт Дагъустандиъ транспортдин циркил жанлуди артмиш шула. Гьадму гьисабнаъ Мягьячгъалайиъ гьюлин вари халкьарин ариш-веришчивалин порт цIийи алапIура. Гьаддихъди сабси, аэропортдиъра рас апIбан ляхнар гъахура ва, мидланра гъайри, транспортдин цирклиъ жюрбежюр цIийивалар тIаъбан ляхнарра гьяракатниинди кIули гъягъюра. Дупну ккундуки, республикайин транспортдин цирклин артмиш’валикан, региондин экономикара асиллу ву», — къайд гъапIну Мукаил Исмяиловди.
«Транспорт. Логистика. Связь 2019» выставкайиъ улупнайи гьарсаб тема цирклариз жара дапIна. Мисалназ, «Транспорт» циркил гъадабгъиш, душваъ вари жюрейин транспорт гьисабназ гъадабгъну рякъюъди гъябгъру, завариан тIибхру, гьюлилан, рукьан рякъярилан гъябгъру, гъулан мяишатдин, промышленностдихъди аьлакьалу транспортди тамам апIурайи ляхнариз лигура. Выставкайиъ транспортдин, логистикайин ва аьлакьайин вари терефар саб майдандиин улупиди. Думу цIийи брендар ачмиш апIбан, коммерцияйин заан мянфяаьтлувалин ва жюрбежюр цирклариан заан дережайин пишекрар уч шлу майдан хьибди.
Гьюрматлу газат урхурайидар, эгер учвуз улупнайи выставкайиъ иштирак хьуз ккундуш, 21-23-пи февралиъ Мягьячгъалайиъ айи Милли библиотекайиз гъачай.
