Хьадукар дуфна, хьадукар…

Гъалин йифарна аязар айи кьюрд кадабхъну, аьтрафариз табиаьт азгар, уягъ апIру хьадукар гъафну.

Мегьел хьадукар хъубкьайизра, гьавйир дигиш гъахьнийи. Ригъдин явашди багахь иликIурайи нурари, табиаьтра гьевеслу апIурайи, гюнейин–раццарикна сифте вуйи кюкйирра ктучIвурайи.

Мани юрдариз кюч духьнайи ихь бицIи дустарра хъадакну гъюри, чпиз цIийи мукьар апIури, хъа садари кюгьне, йирси мукьар дюз алаури, багълариъ чпин шад, хуррам сес атIабгнайи. Жакьварин му назук сеснахъди, кIваз хуш вуйи гьавайихъди, аьхюр-бицIир дарпиди вари чIатар-чIурариз, багълар – бахчйириз, бистнариз хьадукран ляхнар апIуз удучIвурайи. Гьар терефнаъ, табиаьтдин дигиш`валихъди, чимлин кюкдихъди сабси, ляхнар гъягъюрайи.

Мал-къара адапIури, нежбрар, йицар ккитIну, гъулиъди пейин гъабхру йишвариз пейин гъабхури, бер йивру йишвариз бер йивури, гули – картуф кивру йишв гьязур апIури, гьяракатнаъ айи. Мидланра савайи, гъелемар киври, улугури, дурар тартиб апIури лап кIваантIан гьунарлу ва кьвватлу зегьмет зигурайи. Чйир кIуруш, таза варжи, хач уч апIури, десте-дестеди рякъюрайи.

Мициб зегьметнан хьадукар рябкъюз ккундуш ва укIан афрар итIуз иштагь аш, буюр, Мажвгулна йихь ву хялижв!