Февралин 28-пи йигъан Дагъустан Республикайин Правительствойин Председатель Артем Здуновди РД-йин Халкьдин Собраниейин депутатариз правительствойи гъубху ляхнин натижйирикан ктибтну.
Дугъу чан улхбаъ мялум гъапIганси, республикайин Правительствойи агьалйирин яшайишдин дережа за апIбан гьякьнаан саб жерге серенжемар кIули гъахура. «Гьелбетда, пулин бина адарди думу ляхнар тамам апIуз шлудар дар. Гьаддиз учу вари кьувватар экономикайин вари цирклар гьисабназ гъадагъбиина, айи мумкинвалар ачмиш, налогарин бина за апIбиина сарф гъапIунча. Думу ляхни яшайишдин инфраструктурайиз, лихру цIийи йишвар ачмиш апIбаз тясир дапIну ккунду», – гъапну А.Здуновди. Дугъу къайд гъапIганси, бюджетдин ва налогарин цирклариъ кьабул гъапIу уьлчмйири 2018-пи йисан республикайин бюджетдин хусуси гъазанжар 5 миллиард манатдиинди за апIуз, Дагъустан Республикайик кайи гьюкуматдин бурж 2,4 миллиарддиинди цIиб апIуз мумкинвал тувну.
Правительствойин кIулиъ айири гъапиганси, экспертарин улупбариинди, региондин экономикайин 40-рилан 60 процентдиинакьан «сирникк» кка. Гьаддиз экономикайин субъектар налогарин органарин гьисабназ гъадагъбан ляхин тешкил дапIна. «Сирникк» ккайидариз къанундиз асас вуди ляхин апIуз гъитну ккунду.
Урусатдин финансарин Министерствойихъди карханйир гьисабназ гъадагъбалан гъафи налог республикайин бюджетдиъ гъибтбан йикьрар гъийитIну. Табии мяднарилан гъафи аьлава гъазанжарин саб пай республикайин бюджетдиъ гъибтбан ляхинра дубхна.
Урусатдин Сбербанк-дихъди сатIиди «Безналичный Дагестан» проектра уьмриз кечирмиш апIура. Думу проектди туканариъ, жямяаьтлугъ ипIбар-убхъбар апIру йишвариъ, гъуллугъар гьуркIбаъ карточкйирин кюмекниинди алвер апIуз мумкинвал тувра.
А.Здуновди гьацира къайд гъапIганси, 2018-пи йисан налогарин цирклин къанунариъра важиблу дигиш’валар тIаъну. «Аьтрафарин удукьувалариз, дагълу ва дюзен терефариъ ляхин гъабхурайи дилварчйирин мумкинвалар сабсдар дарувализ лигну, налогар илирчбан кьадар дигиш дапIна. Физический касарин хусусиятниин, гьацира 350 кв. метриинакьан алвер апIру ва офисдин объектариин, кадастрин кьиматназ дилигну, налог илипбан къайда дебккна. Мянфяаьтсуз налогарин льготйир хъяркьували бюджетдиз 88 миллион манатдин хайир тувну».
Гьаддихъди сабси, министрарин кабинетдин кIулиъ айири къайд гъапIганси, кьабул апIурайи уьлчмйириз дилигди, Дагъустандиъ бязи цирклар «сирникк» гъузра. Дурарин арайиъ тикилишчивал, ликариин алахьрудар, гъидкьин алатар, авадлугъар гьясил апIувал, алвер апIувал ва жарадар. «Ихь метлеб – экономика «сирниккан» ккадапIбиин ляхин тешкил апIувал ву», – аьлава гъапIну А.Здуновди.
