Ухьуз мялум вуйиганси, гъябгъюрайи йисан Ватандин Аьхю дяви ккудубкIну 75 йис, хъа Хив район ибарат дубхьну 85 йис тамам шула. Му кьюбиб юбилеяриз бахш вуди Хив райондиъ саб жерге мяракйир кIули гъягъюра. Гьяйифки, гьязур дапIнайи планар ва адагънайи къарарар коронавирусди цIиб кьяляхъ йивура.
25-пи март вари Урусатдиъ культурайин Йигъси мялум дапIна. Хив районра му йигъан гъирагъдиъ гъубзундайи. Райондин культурайин хулаъ му йигъаз тялукь вуйи серенжем кIули гъубшнийи. Гьаддихъди сабси, вазтIан улихьна хабар тувну, кьюбиб юбилеяризра бахш дапIнайи шиърар урхбан конкурсдин натижйирра гъивнийи.
Конкурсдиз райондин саки вари гъулариан урхурайидари, шаирари, мялимари, библиотекйирин ва художествойин самодеятельностдин руководителари райондин культурайин, спортдин, жигьиларин политикайин ва туризмдин отделин начальник Казбек Къазиевдин инстаграмдиъ тIапIнайи аккаунтдиз чпин шиърар ва чпи шиърар урхури видеороликар хътаънийи. Дурариз сан гьисаб адрубкьан халкьди тамаши гъапIнийи ва кьимат дивнийи. Хъа 25-пи мартдиъ дурариз конкурсдин натижйир йивбан бадали, Хивна культурайин хулаз дих гъапIнийи.
Серенжем абццри, сифтейин гаф райондин администрацияйин культурайин, спортдин, жигьиларин политикайин ва туризмдин отделин начальник Казбек Къазиевди гъапнийи. Дугъу серенжемдиз уч духьнайидар культурайин Йигъахъди теб-рик гъапIнийи. Хъасин культурайи халкьдин дуланажагъдиъ бисурайи йишван гьякьнаан, гъийин йигъан халкьдин культурайихьна вуйи лигбар дигиш духьнайиваликан ва чав кIулиъ ади, отделин вари коллективди культурайин цирклиан гъабхурайи ляхникан ва айи планарикан ктибт-нийи. Аьхириъ дугъу тешкил дапIнайи конкурсдиканра сакьюдар гафар гъапнийи.
Конкурсдин жюрийин дахилнаъ табасаран халкьдин бажаранлу шаир, филологияйин илмарин кандидат, РФ-дин писателарин Союздин член Эльмира Аьшурбегова, Хив райондин образованиейин отделин кIулиъ айирин заместитель Азадин Юсуфов, Хив гъулан (райондин) ЦБС-дин директор Зумрия Сеидягьмедова айи.
Дурарин къарарниинди конкурсдин натижйир гьамцдар гъахьнийи:
«Учу дявдикан шиърариинди ктибтурча» кIуру конкурсдиъ 1-пи йишв ва 3 агъзур манат З.И. Мирзахановайи (Асккан АрхътIарин гъул) гъадагъну. Хъа 2-пи йишван сагьиб Ш.М. Аьлибалаева (ЧIилихъарин гъул) гъахьну, 3-пи йишв Е.Б. Исаевайи (Хирижв гъул) гъазанмиш гъапIну.
«Йиз багъри юрд кIваз масан» кIуру конкурсдиъ 1-пи йишв ва 3 агъзур манат Ш.М. Аьлибалаевайи (ЧIилихъарин гъул), 2-пи йишв З.Ф. Гюлмягьямедовайи (Хирижв гъул), хъа 3-пи йишв З.М. Рамазановайи (Ургъ`арин гъул) гъадагъну.
Шиърар урхурайидарин арайиъ варитIан жигьил иштиракчи, Ургъа гъул`ан вуйи 4-пи классдиъ урхурайи Аьли Гьясановра грамотайиинди ва В. Бианкийин нахшрарикан эсерар кайи китабдиинди лишанлу гъапIнийи.
Мидланра савайи, конкурсдин иштиракчйир гьязур гъапIу, заан дережайиинди кIвак карсру эсерар дюзмиш гъапIу мялимар ва шаирар, культурайин гъуллугъчйир, чпин ляхниъ заан хъуркьувалар улупу касар гьюрматнан кагъзариинди ва пешкешариинди лишанлу гъапIну. Дурарин арайиъ шаирар Керим Маллаев, Кюребег Мурсалов (Ляхлаарин гъул), урус чIалнан дарсарин мялим Елена Исаева (Хирижв гъул), спортдин ва жигьиларин политикайин гъуллугъчи Анзор Аьлиризаев (Хиварин гъул), ансамблин художествойин руководитель Хизри Маллаев (Хиварин гъул), СДК-йин художествойин руководитель Тариверди Мирзоев (Заан Яракк) айи.
Серенжемдин аьхириъ, вари иштиракчийириз чухсагъул мялум апIури, Эльмира Аьшурбегова, Азадин Юсуфов, Керим Маллаев, Кюребег Мурсалов удучIвну гъулхнийи. Дурари чпин улхбариъ К. Къазиевдикан мицисдар серенжемар, юбилеяриз даршра, йискьубан шубуб-юкьуб ражари гъахуб ккун гъапIнийи, фицики му жюрейин мяракйири жигьиларин арайиъ мясляаьт хьуз, дурарихьди культурайин тIяаьм гьисс апIуз гъитру.
