Табасаран халкьдин тамшир

 

Мялум вуйиганси, Эбелцан – ихь халкьдин кюгьне деврарихъан мина ужуди къаршуламиш апIурайи хьадукран машкврарикан саб ву. Кейванйири машквраз ургуб жюрейин хурагар гьязур апIуйи, хъа баяр-шубари эбелцнан мяълийир апIури, кейванйирихьан савкьатар дисуз гъягъюйи.

 

Ухьуз Эбелцнахъди аьлакьалу жюрбежюр тамширра ахьуз. Дурарикан саб – цIипп хъипуб ву. Му тамшийиъ кьюртIан артухъ касар иштирак шулу. Дурарикан сари хуларин раккнарик кучру ва дурар арццбан кьяляхъ, хулазди чан бачукI, бицIи турба, бедре, яна мутму ивуз шлу алат ипру. Думу дипбан кьяляхъ, учв хулан эйсийиз рякъюз гъидритди, му иштиракчи гьергну ккунду. Эгер цIипп хъипур эйсийиз дярякъди гъузиш, дугъу хулазди ипнайиб хулан эйсийи Эбелцназ гьязур дапIнайи итIру хурагарихъди абцIну кьяляхъ тувну ккунду.

 

Хъа эйсийиз тамши апIурайирин маш гъябкъиш, ясана эйсийи думу гъидисиш, цIипп ичIиди хъяляхъ тувру.