Мартдин 25-пи йигъан Урусатдин Президент Владимир Путин телевизориан тина уьлкейин ватандашарихьна илтIикIну. Уьлкейин кIулиъ айири Москвайиъ COVID-19 уьзур сагъ апIру больницайиз гъягъбан, коронавирусдихъди женг гъабхбан гьяракатнан штабдин совещаниейин кьяляхъ, ватандашарихьна илтIикIуз къарар адабгънийи.
Владимир Путинди коронавирусдихъди арайиз дуфнайи аьгьвалатну вари дюн’яйин экономикайик гъалабулугъ’вал кипнайиваликан гъапну. Дугъу гьацира къайд гъапIганси, РФ-диъ вирус тарабгъувал яваш дапIна, хъа уьзур уьлкейиз гъюру вари рякъяр хъяркьюз шлуб дар.
Владимир Путинди, уьз-рихъди аькси женг гъабхури, дидин улихьишв бисбаъ баркаллу зегьмет зигурайи аьлимариз ва духтрариз чухсагъул мялум, хъа ватандашарикан духтрарин тIалабар тамам апIувал ккун гъапIнийи.
Гьаму гафарин кьяляхъ Президентди чан теклифарикан гъапIнийи.
Сабпиб: Конституцияйиъ дигиш’валар тIаъбан гьякьнаан вуйи сесер тувувал кьанди вуйи вахтназ гъибтувал. «Сесер тувбан жара йигъан гьякьнаан, духтрарин теклифар гьисабназ гъадагъну, къарар адабгъидихьа», – гъапну В.Путинди.
Кьюбпиб: гъюру гьяфтайин йигъар, мартдин 28-пи йигълан башламиш дапIну, 5-пи апрелизкьан, агьалйирин маважиб гъибт- ну, дилихру йигъарси мялум апIувал. Гьаддихъди сабси Президентди къайд гъапIганси, уьмриз чарасуз лазим вуйи цирклари, банкари, транспортди, гьюкмин вари дережайин органари ляхин апIувал давам апIиди. Гьаму ляхни уьзур тарабгъувалин гьяракат яваш дапнIу ккунду.
Шубубпиб: гъюру 6 вазлин арайиъ ватандашариз рукьру вари яшайишдин пособйир ва льготйир, справкйир тутрувишра, давам хьиди. Майдин машкврар улуркьайиз, Гъалибвалин 75 йис тамам хьпахъди аьлакьалуди туврайи пул тувну ккудубкIну ккунду. Дадавалин капитал айи вари хизанариз гьар вазлиъ 5 агъзур манат тувувалин теклиф дивна.
Юкьубпиб: ипотекайин ва жара кредитарин гьякьнаан тятIилар тувувал теклиф апIура. Эгер ватандашдин гъазанж вазлин арайиъ 30 процентдин цIиб гъабхьнуш, думу касдиз журумар дарди кредит кьандиси тувуз ихтияр тувра.
Хьубпиб: бицIи ва кьялан бизнесдиз, НДС ктарди, 6 вазлин арайиъ вари налогар кьанди вушра тувуз ихтияр хьибди. Гьаму аьгьвалатну зарар туву компанйириъ зиихъ гъапи уьлчме кьабул апIиди.
Йирхьубпиб: бикарвализ туврайи пособие МРОТ-дин кьадарниина, яна 12 агъзуриина, за апIбанди ву. Гьамусяаьт дидин кьадар 8 агъзур ву.
Ургубпиб: страховой взносарин кьадар 30 процентдилан 15 процентдиина ис апIиди.
Миржибпиб: Урусатдиан харижи уьлкйириз гъазанж ва процент жюрейиинди гъягъюрайи пулин дакьатариин 15 процент налог иливиди.
КIваина хурача, Урусатдиъ коронавирусдин инфекцияйиан аьзарлу духьнайидарин кьадар, 26-пи мартди лисхъан сяаьт 4-диз вуйи улупбариинди, 844 кас ву, 2 кас кечмиш гъахьну. Саб суткайин арайиъ аьзарлу гъахьидарин кьадар 178 касдиинди артухъ гъабхьну. ВаритIан гизаф аьзарлуйир (546 кас) Москвайиъ а.
Коронавирус тарабгъурайивалихъди аьлакьалу вуди Урусатдиъ культурайин, спортдин, шадлугънан серенжемар гъахувал къадагъа дапIна. ВаритIан ижми къайда Москвайиъ мялум дапIна.
