Уьлкейиъ коронавирус тарабгъбахъди аьлакьалу вуди РФ-дин образованиейин Министерствойи ЕГЭ ва ОГЭ тувру вахт цIиб кьаназ илдипну.
Урусатдин просвещениейин министр Сергей Кравцовди къайд гъапIганси, РФ-дин Президентдин къарарин бинайиинди уьлкейиъ карантин мялум дапIнайи вахтна, образованиейин идарйири ляхин апIидар. Улхуб бицIидарин багъарикан, мектебарикан, аьлава образование тувру идарйирикан, колледжарикан, техникумарикан ва вузарикан гъябгъюра.
«Узу абйир-бабарихьна илтIикIураза. Гьаму вахт ичв веледарин гъайгъушнаъ ади, дурариз мянфяаьт шлуси гьапIай. Учвуз кюмек вуди гьар йигъан ич официалин сайтдиъ вахт мянфяаьтлуди фици гьапIруш, мялуматар туврача. Тялукь мялуматар регионаризра хътаурача. Чпин нубатнаъ регионарин образованиейин министерствйири чпин сайтарианра учвуз лазим вуйи мялуматарикан, кьабул апIурайи уьлчмйирикан хабар тувди»,
– къайд гъапIну Сергей Кравцовди.
Министрин гафариинди, ихь варидарин улихь дийибгънайи асас вазифа – учIру вирус тарабгъурайивалин гьяракат дебккувал, вари идарйириъ дизинфекция гъабхувал ва багахь гележегдиъ урхбан аьдати къайдайихъна гъювал ву.
«Урхбан гьяракат фици тешкил апIуруш ва 6-пи апрелихъан тятIилар давам шулуш, учу уьлкейин эпидемиологияйин аьгьвалат гьисабназ гъадабгъну, улихь ккимиди регионариз хабар дебккдича.
Уьлкейиъ коронавирусдихъди аьлакьалу гъагъи аьгьвалат арайиз дуфнайивализ дилигну, ЕГЭ ва ОГЭ тувру вахт дигиш гъапIну. Саб вуйи гьюкуматдин имтигьнар (ЕГЭ) 8-пи июндихъан ккергъди, хъа 9-пи классарин выпускникар ОГЭ тувуз 9-пи июндихъан хъюгъру»,
– гъапну Сергей Кравцовди.
Рособрнадзорин улупбариинди, гъябгъюрайи йисан 797 агъзур кас, гьадму гьисабнаан ццийин йисан мектеб ккудубкIурайи 692 выпускник ЕГЭ тувуз гьязур шула.
ЕГЭ шубуб этапдиъди тувну ккундийи. Сабпиб – улихь ккамиди тувуз вахт 20-пи мартдиан 13-пи апрелиз улупнайи. Асас имтигьнар – 25-пи майдиан 29-пи июндиз, хъа аьлава вуди имтигьнар 4-пи сентябриан – 22-пи сентябриз.
Гьамусяаьт Рособрнадзори имтигьнарин расписание тартиб апIура ва багарихьди регионариз тялукь методикайин табшуругъар ва теклифар хътаиди.
Гьарсаб региондиъ мялимариз ва абйир-бабариз образованиейин жюрбежюр месэлйириан мялуматар тувру телефондин убцру линия либхура. Дагъустандиъ 8 (8722) 67-08-81 телефондиз зенг апIуз ва образованиейихъди аьлакьалу ичв суалариз жавабар гъадагъуз шулу. РФ-дин просвещениейин Министерствойин федералин убцру линия 8 (800) 200-91-85 йигъ-йишв дарпиди либхура. Гьацира вари мялуматар образованиейин министерствойин официалин сайтдин асас машнаъра тувна ва дурар гьар йигъан таза алаура.
