Дюн’яйиъ инсандиз варитIан багьа вуйиб жвуван ва чан багахьлуйирин сагъ’вал ву. Сагъ’вал адруган, варитIан гюзел йигъра пашманди рябкъюру.

 

 

Аьхиримжи вазари дюн’я-йиъ айи аьгьвалатну яшлу инсанарра гизаф мюгьтал дапIна. Кюгьне вахтари гьамциб аьгьвалат арайиз гъафиган, инсанари гьапIри шуйиш гьерхри, узу аьхю яшнан касдихьна илтIикIнийза.

«Му жюрейин уьзур айи вахт йиз кIваин илимдар. Дадайин ихтилатариан кIваинди имизуз, 20-пи аьсрин эвелиъ, гьаму Жвул’арин аьхю гъяд апIру йисан, гъулаъ айи вари малар гъийихнийи, кIур. Гъулаъ сад жут йицартIан гъузундайи, кIур. Гьаддиз лигну, устйирихьан гъяд ккебгъу йисан ккудубкIуз гъабхьундар. Думу гъяд гъулаз гъюру асас рякъюъ айиб ву.
Инсанар думу вахтари гьамусси мина-тина гизаф гъягъюри шулдайи. Жара чIуру уьзрариан инсанар гизаф йихури шуйи. Гьамусси марццивал адрувализ лигну, жюрбежюр уьзрар тарагъури шуйи. Кечел кайидар гизаф айи. Сарин кIул алдапIу гаркIлихьди тмунуринра кIул алдапIури шуйи. Гьадмугандин инсанариз гаркIал уьзур тарабгъру алат вуйивалин гъавриъ хьуз читинди вуйи. Йиз уьмриъ битIариан инсанар йихру вахтар гъяркъюнзуз, думу уьзурра гъагъи, сарикан тмунурикна тарабгъру уьзур вуйи. Гьамус думу уьзур зат имдарди терг гъапIну. Лап кюгьне вахтариси дарди, йиз девир дармнар айи вахт вуйи. Гьамусра инсанарикан асиллу ляхнар гизаф а: духтрарин тIалабар тамам апIувал, хиларин-машарин марццишин уьбхювал, кючйириз дурушувал. Аллагьдиканра ккун апIурхьа, ухьу му уьзрихьан ярхла апIри», – къайд гъапIну йиз сюгьбатчи Агъариза Гьяжимирзаевди.

Сар инсандикан тмуну инсандикна тарабгъру коронавирусди шагьрар-уьлкйир ккадахьру гьялнахъна духна. Гьамусяаьт думу уьзрикан деребхьу гьич сар инсанкьан амдаршул.

Гьюкуматди чакан асиллу вуйи вари уьлчмйир кьабул апIури ашра, уьзур кьяляхъ гъябгъюри адар. Магьа гьаму гьяфта уьлкейин президентдин къарарниинди ляхин дарапIру гьяфта вуди мялум дапIна. Хъа вари инсанарихьан ляхниз удудучIвди гъузуз шулдар. Духтрар гьарган агьалйирин сагъламвалин гъаразнаъ духьну ккунду. Дурар гьарган ляхниъ айидар ву. Транспортра либхури а. Инсанарин яшайишдиз чарасуз лазим вуйи идарйириъ, туканариъ, аптекйириъ ва хъана жара йишвариъ лихурайидар вари ляхнариъ а. Мектебариз, бицIидарин багъариз гъягърудар, вузарин ва сузарин студентар чпи гьарган яшамиш шулайи йишвариз гьаъна. Гизафдариз манзилнаъди дарсар кивра.

Мициб аьгьвалатнаъ, чIуру уьзур терг апIбан бадали, ухьу гьарсари чахьан удукьру серенжемар гъахувал лазим ву. Гъагъи вахтнаан сагъ-саламатди удучIвуз ухьуз Аллагьди кюмек туври.