Гъийин йигъан Табасаран райондиъ айи образованиейин вари идарйир манзилнаъди аьгъювалар тувбан къайдайихьна илтIикIна. Му ляхин РД-йин образованиейин Министерствойи ккабалгнайи майдандиин: Учи.ру, Российская электронная школа, Якласс, Решу ГИА, Решу ВПР сайтарин кюмекнииндин уьмриз кечирмиш апIура.
Табасаран райондин образованиейин управлениейин методист Алина Бабаевайи къайд гъапIганси, Табасаран райондин гизаф мектебариъ айи мялимари, образованиейин министерствойи ккабалгнайи майдан ишлетмиш апIури, урхурайидарихъди онлайн саягъниинди дарсар гъахура. «Табасаран райондиъ айи вари мектебарин классариъ WhatsАpp мессенджериъ дестйир тешкил дапIна, душваъ мялимари урхурайидариз лазим вуйи суалар, тестар хътаура, хъа баяр-шубарира улупнайи вахтназ мялимдихьна жавабар хътаура. Гьамциб къайдайиинди ляхин апIуз хъюгъхъан мина гизаф мектебариз Интернет адрувалиан, абйир-бабар му къайдайин гъавриъ адрахърайивалиан ва бицIидариз лазим вуйи авадлугъар адрувалиан (телефонар, компьютерар, ноутбукар) хайлин читинвалар алахьну. Гьаци вушра, айи читин месэлйир гьял апIури, Табасаран райондин вари мектебариъ урхурайидари цIийи къайдайиинди ляхин апIуз хъюгъна», – гъапну Алина Шакировнайи.
Дугъан гафариинди, мектебариъ манзилнаъди аьгъювалар тувуз хъюгъхъан мина мялимаризра, абйир-бабаризра гизаф читинвалар алахьура.
Аьхюну пай мялимариз алахьурайи му читинвалар дурар мициб аьгьвалатнахьна гьязурди адрувалихъди, хъа хайлин урхурайидариз – компьютерар ва жара лазим вуйи авадлугъар адрувалихъди аьлакьалу ву. Ккергъбан классариъ урхурайидарикан улхуруш, манзилнаъди аьгъювалар тувбаъ дурариз лапра артухъ читинвалар шула. Му месэла гьял апIбан бадали, дарснан манзилра жараси тешкил дапIну, дидиз жара терефнахъанди дилигну ккунду. Саспи вахтари мялимари дарсар лап ярхи апIуру, гьаддиз саб дарсну тмуну дарсназ машат апIуб мумкин ву. Хулаъ саб компьютер айидариз ва гизаф бицIидар хъайидариз варитIан гъагъиди ву.
Гьаддиз, айиб саб чара ву – йигъ дюзди пай апIувал. Абйир-бабари, лап ухди гъудужвну, чпин гьар йигъандин ляхнар тамам дапIну ккунду. Хъасин бицIидарихъди дарсар гьязур апIбаз фикир тувуб лазим ву. Мушваъ ляхин саб компьютериъ адар, абйир-бабарира бицIидарихъди сатIиди сацIиб ляхин дапIну ккунду», – давам гъапIнийи йиз сюгьбатчийи.
Дупну ккундуки, манзилнаъди аьгъювалар тувбан бадали, чпин бицIидар компьютерарихъди, гаджетарихъди тямин апIуз мумкинвал адру хизанарра ихь арайиъ гизаф а. Гьацдар абйир-бабар, чпин бицIидар фици лазим вуйи авадлугъарихъди тямин апIидикIан кIури, фикрарикк ккахъна. Гизаф бицIидар айи хизанарихьан, халра бицIиб вуйиган, му месэла гьял апIуз удукьурадар, удукьишра, бицIидари чиб-чпиз машат апIубра мумкин ву.
Ухьуз рябкъюрайиганси, манзилнаъди аьгъювалар тувувал – му аьхю дарс ву, гьаддин вари гъавриъ а. Амма мицдар дарсарин ери лап асккануб хьибди. Гьамусяаьт мектебариъ юкьубпи четверть гъябгъюра, дидиъ дарсар дургъувал, гьязурлугъ’вал мектебдиз гъягъюрайи вахтнатIан лап асккандар хьиди. Ухьуз, гьадму читинвалар шлубкьан ухди ихь арайиан дудургну, ихь баяр-шубар вахтниинди чпин аьдати аьгъювалар гъадагъбахьна дуфну ккундухьуз.
