Ватандин Аьхю дявдин Гъалибвалин 75 йисандин юбилейин гъаншариъ Хив райондиъ кьюр дявдин ветеранарин ачIни хпар яшайишдин хуларин сертификатарихъди тямин гъапIну.
Гьаци, 6-пи апрелиъ райондин гьюкмин кIулиъ айидари Гъвандикк гъул’ан вуйи Зарият Агъамирзаевайиз ва ЦIийи Фрюгъ гъул’ан вуйи Тамум Мисрихановайиз хуларихъди тямин апIбан гьякьнаан тялукь сертификатар тувну.
Хив райондин глава Ярмет Ярметовди къайд гъапIганси, улупнайи серенжемар «1941-1945-пи йисарин Ватандин Аьхю дявдин ветеранар ва дурарин ачIни хпар яшайишдин хуларихъди тямин апIбан гьякьнаан» вуйи Урусатдин Президентдин Указдин бинайиинди кIули гъахурайидар ву.
Райондин главайи дишагьлийир улубкьурайи Гъалибвалин йигъахъди тебрик ва дурариз ярхи уьмур ккун гъапIнийи.
Аьлава апIурза, сертификатариз асас вуди, улупнайи ветеранарин ачIни хпариз яшайишдин шартIар мюгькам апIбан метлебариз гьюкуматдин терефнаан 1 миллионтIан артухъ дакьатар жара дапIна.
