Аьхиримжи йисари Дагъустан Республикайиъ жигьил насил тербияламиш ва къанунна политика жигьатнаан савадлу апIбаз, гьацира дидихъди сигъ аьлакьайиъ айи жара ляхнар кIули гъахбаз аьхю эгьемият тувра.
Дербент шагьрин экономикайинна ихтиярарин колледждиъ му ляхин фици гъабхураш ахтармиш апIбан бадали, узу мушваъ тешкил дапIнайи жигьиларин «Респект» кIуру комитетдин кIулиъ айи Закир Шихрягьимовдихъди гюрюшмиш гъахьнийиза. Шагьриъ Закир Аьбдунасирович аьхю шулайи наслиз тербия ва аьгъювалар тувбаъ хъугъ’вал али касси гъисаб апIура. Думу чан ляхин ужуди аьгъю, тажрубалу пишекар ву.
Колледждиъ жигьиларин ляхнариз лигру комитетди жигьиларихъди гаф-чIал апIуз гъабхурайи асас ляхин фицдар месэлйириин биналамиш шулаш гьерхган, дугъу узуз гьамциб жаваб тувнийи:
– Ич комитетди, жигьилариз ватандаш’валин, рягьимлувалин, эдеблувалин тербия тувбан бадали, жюрбежюр серенжемар кIули гъахура. Дербент шагьрин жигьилар эскервалинна ватанпервервалин гьиссариккди тербияламиш апIбан ляхинра фикирсузди гъибтнадарча. Гьар йисан 15-пи феврали Афгъан дявдин иштиракчйирин Йигъ къайд дапIну, ветеранарин 9-пи Майин машквриз вуйи серенжемар кIули гъахури шулча. Му серенжемариъ Ватандин Аьхю дявдин иштиракчйир, дявдиъ гъийиху ветеранарин хпар, Афгъан дявдин, чечендин гьядисйирин иштаракчйир, эскервалин гъуллугънаан Ватандиз бабарин улукьуз гьаънайи эскрар ва миди вуйи жигьилар иштирак шулу.
Гьамусяаьт Афгъан дявдин ветеранарихъди гюрюшмиш шулача. Цци Афгъанистандиан советарин кьушмар адаъхъан мина сумчIурна сад йис тамам гъабхьну. ЙицIуд йисандин арайиъ Афгъанистандин ругариин чпин ватандаш’валин буржи тамам апIури гъахьи ихь жигьиларикан 13 агъзуртIан артухъ касари чпин уьмрар думу дявдиъ кьатI гъапIну, 50 агъзуртIан артухъ жигьилар душв’ан инвалидар духьну кьяляхъ гъафну. Думу йисари Афгъанистандин гьядисйириъ иштирак гъахьи, душваъ чпин кьягьялвал улупу Дербент шагьрин жигьилар йицIбариинди ктухуз шулу.
Магьа гъи учу колледждиъ жигьиларин саб бицIи комитет ачмиш дапIнача, дидин иштаракчйир сабпи курснан студентар ву: Пери Гьюсейбегова, Анагозе Аьдилова, Амина Сеферова, Мевлюд Аьгьмедов, Мягьямед Шихрягьимов.
Дербент шагьрин культурайин Хулаъ гьамцдар йигъариз тялукь вуди гьязур дапIнайи яркьу программайин концертариъра, имбу серенжемариъра иштарак’вал апIури шулча. Инвалидарихьна хулариз гъягъюри, дурарин дерди тамам апIури, учхьан шлу кюмек тувурча. Дурар ухьу гьарган фикриъ гъитну, кIваина хури ккунду. Гьаз гъапиш, учу дявдиъ гъахьи гьядисйирикан гьерхруган, душваъ чпиин улуркьу читинваларикан ктибтувал ккун гъапIиган, дурари, читин йигъар кIваина хидархьа, гъит дурар тарихдиъ гъузри, кIури шулу.
Аьхириъ пуз ккундузузки, узу гьаму йиз бицIи жигьиларин комитетдин бицIи дестейихъди Дербент шагьриъ шлу ветеранарин йигъаз кIули гъахурайи серенжемариъра, жара мяракйириъра иштирак’вал апIураза. ДумутIанра савайи, яратмиш апIувал ва бажаран’вал кайидар рюгьламиш апIувал метлеб вуди, гьар йисан жигьиларин Йигъ къайд апIури шулча, – аьлава гъапIнийи Закир Шихрягьимовди.
