Коронавирусдиан дюн’яйиъ айи эпидемиологияйин аьгьвалат йигълан-йигъаз пис шулайивалихъди аьлакьалу вуди, Урусатдин образованиейин идарйири гьяракатниинди уьлчмйир кьабул гъапIну: мектебариъ урхурайидар, студентар манзилнаъди компьютериан мина дарсар тувру къайдайиз адаъну.
РФ-дин образованиейин ва илимдин Министерствойи 2020-пи йисан мартдин 14-пи йигъан адабгъу 397-пи нумрайин приказдиъ студентариз манзилнаъди дарсар кивбан кьюб жюрейин теклифар дивнайи: сабпиб, эпидемияйин аьгьвалат гъагъиди вуйи регионариъ, очно дарсар тувувал дебккну, манзилнаъди дарсар кивувалин къайдайиз удучIвувал. Вуздин ректори студентар манзилнаъди дарсар тувбан къайдайиз адаъбан гьякьнаан къарар адабгъну ккунду. Думу къарарнаъ гьациб къайдайиз удучIвбан себеб, къарар фукьан вахтна кьувватнаъ шулуш, вахт улупнади ккунду.
Хъа, кьюбпиб, эпидемиологияйин аьгьвалат гъагъиди дару йишвариъ айи вузариъра чпин хушниинди манзилнаъди аьгъювалар гъадагъуз ккуни студентариз гьациб ихтияр тувувал. Мушваъра вуздин ректори къарар кьабул дапIну ккунду.
Гьаму уьлчмйир, образованиейин идарйириъ инсанарин арайиъ багахьди вуйи аьлакьйир цIиб апIбан бадали, кьабул дапIнайидар ву. Урхурайидариз урхбан хусуси планар тувна, хъа чарасузвал гъабхьиш, бязи дарсар гъюру семестриз адагъиди.
Урхбан заан образованиейин идарйир манзилнаъди дарсар тувбан къайдайиз адаъбан гьякьнаан къарар адабгъуз ихтияр регионариз тувнайивализ лигну, Дагъустан Республикайиъ вари вузарин студентар манзилнаъди аьгъювалар гъадагъбан къайдайиз адаъна. Му жюрейин къарар адбгъуз ихь региондиъ варитIан читинди Дагъустандин гьюкуматдин медицинайин университетдиз алабхъну. Фицики му вуздиъ заочно урхру студентаркьан адар. Медуниверситетдин студентарин, жара студентаринси дарди, дарсарра гизаф шулу. «Учу мялимарихъди Интернетдиъ айи «Зум» приложениейиан тина аьлакьа уьбхюрача. Гьацира учухь университетдин портал ачмиш дапIна, душваъ мялимари чпин лекцйир ирчра, дарсар гьаци дургъурача», – ктибтура ДГМУ-йин 4-пи курснан студент Билал Пирмягьямедовди.
«Ич университет техника жигьатнаан улихь дубшнайи университет ву. Манзилнаъди дарсар кивбан къайдайиз университет читинвалар адарди удубчIвну. Гьелбетда, бегьем вердиш хьайиз, читинвалар алахьура. Мялимари табшуругъар тувра, хъа студентари дурар тамам апIура: шли сайтдиъ ирчра, хъа сасдар студентари почтайиз хътаура. Вушра, университетдиз дарсариз гъягъругансиб натижа шлуганси дар. Апрелин ваз ктабхъайизкьан университет гьаму къайдайиинди либхури гъубзди. Гьаддин кьяляхъ дарсар аьдати къайдайиинди кивди кIури, умуд кивурхьа», – къайд гъапIну ич сюгьбатнаъ ДГТУ-йин 2-пи курснан студент Марат Гьяжимурадовди.
Студентариз Урусатдин машгьур вузари гьязур дапIнайи, Интернетдиъ айи курсарира кюмек апIура. Урусатдин образованиейин ва илимдин Министерство вузар консультацйир тувру гъурулушдихъди тямин апIбан гъаразнаъ а. Эпидемияйин шартIариъ ляхин апIбан гьякьнаан вузариз вуйи вари мялуматар РФ-дин илимдин ва заан образованиейин Министерствойин порталиъ чап апIиди. Мялуматар кми-кмиди цIийи алаиди.
