Гъи COVID-19 коронавирусди арайиз дубхнайи тIягъвни инсаниятдин уьмур бинайиан дигиш апIура. Вари дюн’яйин гьюкуматариъ театрар, музеяр, библиотекйир, культурайин идарйир, карантин мялум дапIну, хъяркьна. Амма, агьалйир искусствойин макандихъ тамарзу дархьувал метлеб вуди, гизаф театрари, музеяри чпин ляхин онлайн саягъниинди гъабхуз рякъяр гъагну. Гьадму къайдайиинди гъи Гьюкуматдин табасаран драмтеатрира ляхин апIура.
Гьаму йигъари узу ихь театрин директор Аьлимурад Аьлимурадовдихъди телефондиан сюгьбат гъубхнийза. Дугъу узуз фунуб вахтна театрин артистар онлайндин эфириз удучIвураш ва фицдар спектаклариз наан ва фици лигуз мумкинвал шулуш, ктибтнийи.
«Учу ачухъ онлайн къайдайиъди улупру спектакларин ва классикарин литературайин яратмишарихъди ватандашар таниш апIру эфирин хусуси программа тартиб дапIнача. Мисалназ, 13-пи апрелиъ сяаьт хябяхъдин хьубдиъ табасаран драмтеатрин актер Аким Сяидялиевди ачухъ эфириан ихь машгьур шаир Шамил Къазиевдин варидиз кьабулди вуйи эсер «Хъинцамегьмер» бабан чIалниинди гъурхну. Апрелин 20-пи йигъан ихь шаир, театрин гъуллугъчи Гюлбика Уьмаровайи МутIалиб Митаровдин шиърарихъди хъпехърудар таниш апIиди. Дупну ккундуки, гъябгъюрайи йисан ихь машгьур шаир, классик МутIалиб Митаровдин бабкан духьну 100 йис шула. Учу тешкил апIурайи эфир дугъан юбилейихъди тялукь апIидича. Мидланра гъайри, театрин режиссер Жамбулат Гьябибов ачухъ эфириз Кюребег Мурсаловдин яратмишар хьади удучIвиди.
Спектакларикан улхруси гъабхьиш, 27-пи мартдиъ учу табасаран театрин сягьнайиин саб спектакль дивнийча. Думу ич ютуб-каналиан ачухъ вуйи эфириъ улупнийча. Интернетдин кюмекниинди газафдариз хулаъ деъну амиди думу спектаклиз лигуз мумкинвал гъабхьну. Вари разиди айи. Амма 28-пи мартдихъан варидариз ляхнариз удучIвуз ихтияр туврадар. Гьадму себеб вуди, РД-йин культурайин Министерствойи ляхин хулаъ деъну амиди тешкил апIбан цIийи план тартиб гъапIну. Гьамус ихь театри онлайн къайдайиинди швнуб-саб спектакль улупиди. Улихьнаси учу гьадму саягъниинди Юсуф Базутаевдин пьесайиан диву «Гъала» спектакль улупнийча. Му спектакль, мисалназ, чан аьхювализ ва сягьнайин гизаф авадлугъар айивализ дилигну, Урусатдин саб шагьризра гъабхуз шулдар. Амма дидиз лигуз аьшкь айидар хайлин айи. Думу ачухъ эфириан улупруваликан улихь ккимиди мялумат тувнийча. Урусатдин ярхла шагьрариан швнур-сар касди, чпи хулаъ деъну амиди, гьамциб мумкинвал дабгну, гьадму спектакль улупувализ чухсагъул мялум апIури, зенгар гъапIнийчуз»,
– гъапнийи Аьлимурад Аьлимурадовди.
Директори къайд гъапIганси, апрелин аьхириз театри ачухъ эфириан улупуз швнуб-саб спектакль планламиш дапIна. Фунур-вушра касдихьан, Гьюкуматдин табасаран драмтеатрин сайтдиъ учIвну, социалин сеть Инстаграмдин tabasaran_teatr машнаъ гъягъру эфирарин афишайихъди таниш хьуз шулу.
