Хив райондин ветеранарин ва агъсакъларин Советдин председатель Тажудин Мурадханов вари дюн`яйиъ тарабгънайи коронавирус уьзрин гьякьнаан ихь ватанагьлийирихьна илтIикIну. Дугъан гафар исихъ чап апIурача.
«Гьюрматлу ватанагьлийир! Ухьуз варидариз рябкъюрайиганси, аьхиримжи вазари коронавирус кIуру уьзри вари дюн`яйик гъалабулугъ’вал кипна. Думу уьзриз аькси вуди ихь Президентди, республикайин Главайи гъахурайи ляхнарин ухьу вари шагьидар вухьа. Амма, гьяйифки, саб бязи инсанар зазариин алидарси а. Дурарихьан улупнайи вахтназ архаинди ва сабурлуди чпин хулариъ гъузуз шуладар.
Ав, гъавриъ аза, вари гьюкуматдин ляхнариъ айидар дар, дурариз гьа фици-вушра чпин вазли гъюрайи маважибар саб кепек ис-за дарапIди гъюра. Хъа чпиз ккабхъу ляхин-кар апIури, гвачIин-хябяхъ апIурайидарра гъи ихь арайиъ цIиб адар. Вушра, айи-адрубдин цIиб кьадар дапIну, ккимбуб ккимиди гъузну, ухьуз улупнайи вахтназ ихь хулариъ гъузнийиш, гьелбетда, Дагъустандиъ уьзри мукьан ярхи ччив ккивурдайи. Гъирагъдилан кепек-шигьи дяргъюрайи хизанариз ихь гьюкуматди, багъридари, фондари кюмекар туврувалиин ва дурариз гаш`вал рябкъюз гъидритрувалиин узу умудлу вуза.
Мидланра савайи, узуз му уьзриз аькси вуди Хив райондин глава Ярмет Ярметовди, РОВД-йин вахтназди вуйи начальник Камал Гьясановди, ЦРБ-йин вахтназ вуйи кIу-лин духтир Агъамягьямед Нурмягьямедовди гъахурайи ляхнариканра кIваин апIуз ккундузуз. РФ-дин Президентдин, республикайин Главайин къарарарихъди гъягъюри, дурари, райондиан, гъулариан шагьрариз гъягъру-гъюру машинарин ва инсанарин кьадар цIиб апIури, гъуларин кючйиригъян хулариъ гъузуб тIалаб апIури ва цIийи хабрар туври, полицияйин машинар гьаъри, даршлу яшлуйириз туканариан, аптекйириан лазим вуйи рубар-дармнариз ва жара ляхнариз кюмекар туври, волонтерар гъяъри, райондин кючйириз машинариан штар ерчури, бишируг терг апIури, гьава таза алапIру ва саб жерге жара ляхнар кIули гъахура.
Гьюрматлу ватанагьлийир, хилар ккидисну, кьамкьариинди деъну миннат апIуразачвуз… Узу зиихъ дупнайиганси, хизандин арайиъ сабурлуди, рягьимлуди, Аллагь кIваин алди ва ккимбуб ккимиди улупнайи вахтназ хулариъ гъузай. Гьаци гъахьиш, ухьу му уьзриин гъалиб хьиди!»
