Табасаран райондин Хючна гъулан сабпи нумрайин мектеб гьарган ужудар мялимар, заан хъуркьувалариинди мектеб ккудубкIру баяр-шубар айивалиинди машгьур ву. Директор Жейран Къулиевайинра мектебдиъ гъазанмиш апIурайи хъуркьуваларик лайикьлу пай ка.

Гъи узуз гьадму мектебдин 10-пи «б» классдиъ урхурайи Сагдагюл Нежефовайикан ктибтуз ккундузуз. Думу Хючна гъулаъ Имамудин Сиражудинович ва Интизар Мигьрялиевна Нежефоварин хизандиъ бабкан гъахьну. Нежефоварин хизандиъ 6 велед а. Сагдагюл, ккергъбан классарихъан хъюгъну, ужуди дарсар урхури, аьгъювалар гъадагъбаъ заан хъуркьувалар улупурайи риш ву. Дугъан варитIан юкIв алидар математикайин ва физикайин дарсар ву. Мектебариъ урхурайи гизаф пай бицIидари му дарсар лап читиндарси гьисаб апIуру. Хъа Сагдагюлиз дарсар аьгъю апIбаан читинвал адар. Жара предметарианра шуру ужудар хъуркьувалар улупура. Сагдагюл райондиъ кIули гъягъру олимпиадйирин ужур иштиракчира ву. Дугъаз инглис чIалнаан, химияйиан, физикайиан, обществознаниейиан олимпиадйириъ пешкешнан йишвар гъадагъбан швнуб-саб грамота а.

Сагдагюлихьан, гъюру йисан мектеб ккудубкIруган, фуну дарсариан ЕГЭ тувруш, гьерхнийза.

– Узу урус чIал ва пише-йихъди аьлакьалу математикайилан савайи, физика ва обществознаниера тувбанди вуза. Думу предметариан дарсар ккунидар вузуз, гьаддиз дурариан ЕГЭ-ра заан баллариз тувуз хьибди кIури, умуд кивраза. Фицики узу, азад вахт ккабхъубси, математикайиан ЕГЭ-йиз гьязур шулаза.

Узу Сагдагюл, 6 велед тербияламиш апIурайи дугъан дада Интизар, мектебдин директор ва мялим дишагьлийир дишагьлийирин йигъахъди – 8-пи мартдихъди кIваантIан тебрик апIураза. Ичв варидарин кIваъ айи ужудар хиялар кIулиз удучIвувал ккун апIураза.