Улихьна йигъари Табасаран райондин Туриф гъулан жигьилари, гьарури чахьан удукьру дакьатар кивну, гъулаъ айи, гизаф вахтна ккадахьну айи аьхю латар рас гъапIну.

 

 

Расвалин ляхнар кIули гъахури, дурари латар али вари йишвак гъваъ кивну, элебкну ва гьаддихъди сабси мал-къарайиз шид тувру йишвна халачйир ва палтар урччру йишв жара гъапIну.

Пуб лазим вуки, сабабнан ляхнар кIули гъахуз жягьтлувал улупу гъулан жигьиларин хъанара хайлин ляхнар давам апIуз ниятар а.

Туриф гъулан жямяаьтди му жигьилариз чухсагъул мялум ва дурариз жандин сагъ’вал ккун апIура.

Сабсан гьамциб сабабнан ляхин ЧвулатI гъулаъра кIули гъубшну. Мушваъ гъулан жямяаьтдин ва меценатарин кюмекниинди ЧвулатIна вуйи рякъюн зиин «Хялар йихьай» дибикIнайи, 4,5 метр ягълишин айи аьхю рукьан тагъ дивну.

Му жюрейин ужудар ляхнар ЧвулатI гъулаъ сачтIан ккергънайидар ву. Табасаран райондин собраниейин депутат Мартин Сефербегов улихь гьучIвну, гъубшу йисан августдин вазли гъулаъ айи, 1926-пи йисан яратмиш гъапIу, чарх жюрейин гъвандин гъяд ва 1970-пи йисари чIур гъабхьи мист рас апIбан ляхнар кIули гъахуз хъюгъну. Гъяд рас дапIну ккудубкIну, хъа мистан расвалин ляхнар гъягъюри ими. Мидланра гъайри, М. Сефербегов кIулиъ ади гъулаъ, тарихдиъ гъузру хайлин жара ляхнарра гъахура. Гьамусяаьт чвултIарин жигьиларин улихь дийибгънайи месэла – гъулаъ жигьилариз футболин майдан тикмиш апIуб ву. Багарихьди дидизра дакьатар уч апIиди.

Чан жягьтлувалиинди гъулаъ ккергъу ляхнариз кюмек апIбаз Мартин Сефербеговди вари гъулан жямяаьтдиз газатдин машариан тина чухсагъул мялум апIура.

Йиз фикриинди, гьамцдар сабабнан ляхнар ихь районарин гьарсаб гъулан жигьилари апIуз хъюгънийиш, гъулар ва район артмиш ва айибтIан уткан хьидийи.