Дагъустан Республикайин аьтрафариин али Федералин гьюкуматдин статистика гъабхру гъуллугънан пишекрари гьар гьяфтайин арайиъ республикайин базрариъ ва аьхю-бицIи супермаркетариъ масу туврайи шей’арин кьиматарин зиин гюзчивал гъабхура.

 

Гъубшу гьяфтайиъ гъуху ахтармишарин натижйириинди, республикайиъ ипIру-убхъру шей’арин кьиматар за гъахьну. Мисал вуди гъадабгъиш, вичарин кьимат 4,6%-дин, гулйирин кьимат 7,4%-дин, картфарин кьимат 2,2%-дин, хъа таза памадраринна арфанйирин кьимат 2,5%-дин за дубхьна. Анжагъ саб келемдин кьимат 3,1%-дин ис гъабхьну.

Мидланра гъайри, Дагъстатди республикайиъ имбуну хайлин жара шей’аринра кьиматарин зиин гюзчивал гъабхура. Дагъстатдин пресс-гъуллугънаан тувнайи мялуматариинди, 2,2% гречкайин, 1,6% кIару чайран, 1,5% хахран кьиматар за духьна. Гьаддихъди сабси саспи дармнарра багьа гъахьну. Троксерутиндин кьимат 1,6%-дин, линекс ва альмагель дармнарин – 1,3%-дин за гъапIну.

Хулан гьяйванатариз тувру итIру сурсатарин кьимат аьхиримжи гьяфтайиъ 2,5%-дин шампунарин кьимат 1,7%-дин за дубхьна. Хъа машинарихъ хъубзру бензиндин, соляркайин кьимат чан айиганси ими.

Март вазлин кьиматарихьди тевруш, анальгин (15,9%), валокардин (6%), поливитаминар (6,9%), бромгексин (5,3%) дармнар багьа гъахьну.

Къайд апIуб лазим вуки, гьамусяаьт гьарсаб сурсатдин, шейънан кьимат Дагъустан Республикайин аьтрафариин али Федералин гьюкуматдин статистика гъабхру гъуллугънан пишекрарин гюзчиваликк кка. Гьаддиз алдарди кьиматар за апIуз чалишмиш махьанай, алверчйир.