Гьюрматлу ватанагьлийир, гьамусяаьт вари дюн’яйиъ тарабгънайи коронавирус кIуру уьзрикан хабар-этер адру кас ихь арайиъ тек-бирра имдаршул.

 

 

 

Узуз гъийин йиз макьалайиъ гьаму иццрушнакан мялум гъабхьибси «инсанвал» фтиз кIуруш гъудубгу касарикан бикIуз ккундузуз. Ав, ав. Узу гъалатI духьнадарза, цIар ккадатури, текрар апIураза: «инсанвал» гъудубгу касарикан.

ИкибаштIан, алверчийиз, чав масу туврайи шейъниин манат илиливиш, яна апIурайи ариш-веришдикан жвуваз, жвуван хал-хизандиз кепкин хайир ктарди гъабхьиш, гьаз вухъа думу дапIну? Гьич гьазкIара! Хъа вушра, гьарсабдин аьд-аьдалат, кьадар-кьисмат дубхьну ккунду. Халкьди иштагь ади масу гъадабгъури гъябкъну кIури, дид`ин кьюбдри кьимат илиливур, аьхир. Мисалназ, гьадму уьзрихьан уьрхюз мумкин ву кIури, 20 манат кьиматнахъ туврайи лимон 70 манатдиз, 70 манатдиъ айи кило шарш 400 манатдиз, 400 манатдиъ айи кило имбирь 1000 манатдиз масу тувуз хъюгъну. Миди вуйи итIру сурсатарин кьиматарра гьаци ву. Баладар гьа, чпи гьамус хурайи, таза шейъниин иливура пну, хъа мурари, вазар улихьна чпи масу гъадагъну айи, думуган иша дурушру шей’ариинра кьиматар иливну а, аьхир.

Эй, инсан… аьжуз мутму, фу апIуз ккава? Мид`инди фу гъазанмиш апIидива? Гъазанмиш гъапIуб ибшри, хал авадан, увура Аллагьдин кIанакк лицури адарна? Халкьдиз, гъуншдиз, гъулажвуваз гъабхьиб увуз даршул кIури, хиял вунив? Яв юкIв фтикан вуяв?

Эгер сабцIибкьан намус-гьяя ва гъир`ят фтиз кIуруш аьгъюди имийиш, мицдар касари зиихъ узу тувнайи суалар чиб-чпиз тувуйи.

Мициб гьял саб шагьрариъ ваъ, хъа саки вари гъулариъра арайиз дуфна. Узу мюгьтал вуза… Сарун мурарин сар-сарихъди гаф-чIал, салам-калам дапIну, уьлин кьацI дипIну, хайир-шейирнак кади гьаз вухъа, эгер гьамциб читин йигъанра сар-сариз кюмекназ дяргъруган? Узу зиихъ дупнайиганси, аьжуз мутму вува, эй, инсан! Фу увухьди хьади гъафунва му дюн`яйиина, увухьди фу хьади гъягъюз миж кайив? Инсанвал ужуб лишан ву, аьхир. Гьарсабдин кьадар айиб ву. Саб дакьикьайин арайиъра эрг’вал диривди, йишв-йигъ дарпи уву гъилихишра, дюн`яйиин алибкьан нази-ниъмат уч апIуз хьидарвухьан аьхир, эй, бейнава.

Ав, гьамци хьувал халкьдин аьх апIуз аьгъдрувалихъди аьлакьалу ву. Дюн`яйиъ аьхирзаман шулайиганси, вазар-йисариз итIру сурсатар масу гъадагъну а. Халкьди, гаш`валихьан гучIури, сар-сар ккачIаркIури, туканар ичIи апIурайивал гъябкъиган, туканчйирин кьюбдри кьиматар за апIуз иштагь гъабхьну. Хиял апIарваки, эгер дюн`яйиин гаш’вал алабхъруси ва аьхирзаман шлуси гъабхьиш, мурар гьаму гъадагънайи хюйирина чIихрари, дюгйири дидккан ккадагъуру, – мурари масу гъадагъну хулариъ дивнайи итIру сурсатариз аьхир адар дупну. КIваин апIуз ккундузуз, цIиб улихьна йисари халкьди, аьхирзаман шула кIури, туканариъ шамарна кьилар гъитундайи. Ихь абйири кIуруганси, сари кечел ва кур ву гъапиган, гьаци дубхьну гъябгъюрира ву.

Хъа вари туканчйир дици адар гьа. Саб хайлин туканариъ гьаруб чан айи кьиматназ масу туври ими. Шарш, имбирь ва лимон гьаци пул дарди, чIанади туврайи туканарра а. Саб хайлин фондар арццну, халкьдиз кюмек туври ликар алдагъурайи касар, волонтерар а. Гъит дурарин апIурайи ниятар Аллагьди кьабул апIри, алдагъурайи ликар женнетдиъ ишри чпин!

Мидланра савайи, халкьдиз гучIар ккаъри, видеороликар ва аудиозаписар апIурайи бюаьриканра кьюб келима дикIуз ккундузуз.

Гьаму йигъари саб 35-40 йисарин яшариъ айи касди, чав итIру сурсатар масу гъадагъурайивал телефондизра адабгъури, тукандиъ фукIа амдар, магьа гьаму жергейиз лигай, фукIа амдарди, халкьди вари тIараш гъапIну кIури, гъалабулугъ’вал кипру видеоролик гьязур дапIну, интернетдиъ ипну. Cаб вахтналан, тукандин эйсийи чан магазиндик кайи жини камерайиан суракь апIуруш, гьаму зиихъ улупнайи игитри, сифте кьялан жергейиъ айи сурсатар, хулаз лазим вуйи жара мутмйир асккан жергейизна заан жергейиз пай дапIну, кьулариин илимбу саб-кьюб мутму чав масу гъадагъури, телефондиз адабгъурайиб ичIи дубхьнайи кьялан жерге вуди гъабхьну. Хъасин думу, чав дидисну, журумдин буржра илибтIбалан кьяляхъ, багъишламишар гъадагъбан видеороликар апIури, халкьдихьан илтIикура. Мицисдар бюаьр гъи ихь арайиъ цIиб адар гьа. Садари больницйир ичIидар ву кIури, садари вирус зат адар, мухъугъанай кIури, садари вирусдикан зарафатнан, аьлхъбан-кялхъбан мяълийир дюзмиш апIури, ярхи йигъди зат сикинвал ва архаинвал адар дурариз. Гьелбетда, мурариз гьюкуматдин терефнаан адабгънайи къарарну апIурайи аьрна-эсер ва гучI`вал адар. Саб гафниинди, хъана текрар апIураза, инсанвалин шартIар дургурайидарин гъи сан-гьисаб адар.

Гьюрматлу ватанагьлийир, ухьу сарра Аллагьдихьан кагъаз гъадабгънайидар дархьа ва саризра ихь аьхиримжи йигъ фила вуш, мялум дархьуз. Ризкьна аьжал Аллагьдин хилиъ а. Шюкюр ибшри Первердигариз, дугъу тувнайи йигъариз! Гьаддиз ухьухьна илтIикIурайи ихь мялимари, шаирари, аьлимари, духтрари, главйири, президентди кIурайиганси, адагънайи къарарарихъди разивал ади, ухьуз улупнайи вахтназ ихь баяр-шубариз тербия туври, айи-адрубдин кьадар дапIну, гъягъру-гъюрушваз саб артухъ лик ярхи дарапIди, сир-мясляаьтниинди ихь хулариъ гъуздихьа. Хъа хулариъ апIру ляхнар-карарин кьадарра инсандин жан илимбукьан гагьди кам шлуб дар. Гьаддиз, гьюрматлу ватанагьлийир, ичв багъ-бистнилан илтIикIури хътIикIури, зегьмет зигури, улупнайи ва тувнайи вахт закурин йигъаз мянфяаьт кади адапIай. Гьаци, ухьу айи йишваъ сагъ-саламатди гъахьиш, йиз фикриан, нубатнан ражари вуди, му уьзриинра гъалиб хьидихьа.

Гъит, я Аллагь, 9-пи майиз му уьзур мушвариан терг ибшри ва Гъалибвалин Йигъ къаршуламиш апIури, ухьуз сабсан гъалибвалин хабар артухъ ибшри, гьюрматлу ватанагьлийир.