Дада – фукьан ширин гаф ву му. Йиз уьмриъ дада варитIан багахьлу кас ва ургуб дердназ дарман вуйиз. Дадайи веледарихъ зигурайи зегьметнакан, гьар вахтна фикрикк ккайи кIвакан кидибтну удукьуз шлу ляхин дар. Гьациб деринвал кIваъ айи кас ву дада. Фукьан йишвар гъушну дадайин йиз кIулихъ деуз вахт дарди, дахъуз мажал дарди. Йиз тIуб гьадабтIишра, яв кIваз уццру апIуруки, жан дада.

Дадин юкIвсиб юкIв жил`ин сарун бихъдар. Амма гьацIариз дадайин гъадри цIиб кьанди шулу. Дицистар ихь арайиъ зат даришри, юлдшар. Дадасир инсан дюн`яйиин шулдар. Дада уву гафариинди дарпишра, яв машнан кIалбар, даркбар, рангар гадатIнайивал гъябкъиган гъавриъ шулу. Дада кIуру гаф фуну чIалниинди гъадабгъишра мелзналан йиччвси ширинди ебхьуру. Гъит хъана дада кIуру ччвур тувуз шлу ксар гьаци ширинди ва багьаллуди гъузри ихь гьарсарин уьмриъ! Дадайи чIигъра апIур, кабтIузра кабтIур, амма велед даккунди ваъ, дугъан закурин йигъкан фикир дапIну, гъи имиди алдабхъурайи ухьт ву.

«Йиз дада дюн`яйиъ варитIан ужур ву». Йиз дадайин узухьна вуйи ккунивал, убхурайи халачайин накьишариан, убжурайи мани уьлин нур туврайи машнаан рябкъюразуз. Чухсагъул, ДАДА, увусир кас йиз уьмриъ айивализ. Чухсагъул, ДАДА, увхьан гъюрайи манишназ. Чухсагъул, ДАДА, яв итирин ниъ хъайи хилар узук куркIрайивализ. Чухсагъул, ДАДА, уву йиз уьмриъ акв туврайивализ. Уву йиз уьмриъ бахтнан аку нур убгъурава. Йиз уьмриъ узуз чешне вува, дарман дада. Дада, Ватан, ЧIал гъюбхю кас дюн`яйик пай кайир, женнетягьли ву кIури яв гьар йигъандин дарсар вузуз, жан дада.

Дада, узуз уву дюн`ятIан ккундузуз!

Дада, уву адру женнет багъра ккундарзуз…