Дада – аьжаб жикъи гаф дарин, баркаван ибшривуз! Амма гьаму жикъи гафназ аьхир адрубкьан мяна а… Дада наан ашра, шлиз вушра, гьаммишан кIваъ сабур айи мани инсан ву. Дадайихьна аьхир адру гьюрмат ва ккунивал айиз. Йиз дадайиз швнуд йис вушра, дугъаз гьаммишан узу бицIир ву. Йиз кьябан кIулхъан гъудужвуз зат мажал дарди, йигъар ва йишвар адаур ву. Тухъди фун чан адрабцIди, ликрин кIулихъ узу кIваинди, тухъди узуз уьл тувурза кIури, алабхьру палатдиз чара апIурза кIури, жан фида апIурайи кас вуйиз дада. Фукьан веледарихъди уллан нивгъ гъябгъру вахтара дадйирин уьмриъ шула, дустар. Хъа гьаму вари кIваълан гьархуз шулин?

Дюн`яйиин али вари аьламатар, ляхнар, девлетар кIваълан гьархишра, дада кIваълан гьауз, дугъан зегьмет гьархуз шулдарзухьан. Дадайикан вуйи фикрар-хиялариз, дахъну нивкIукдикьан айи вахтна аьхир адариз. Хъанара дурариз аьхир дубхьну ккундарзуз. Дюн`яйиина узу халкь гъапIу йигъланмина саб вахтнара йиз уьмриан дадайин ширин гаф, мани хил гьич саб герендикьан узхьан ярхла гъахьундар. Я дициб йигъ узуз кьисмат дубхьнура ккундарзуз, жан дада. «Йиз дада дюн`яйиъ варитIан ужур ву». Аьзиз дада, йиз уьмриъ увуз гиран ктапIнуш, йиз камиваларилан уву хил алдабгъ, уву узуз багъишламиш апIин, жан дада! Гъи дарза сарун набалугъ, яв гьарсаб дихназ, дердназ хьидиза яв гъуллугънаъ. Узуз уву аьхир адрубкьан ккундузуз, жан дада!