Дада – фукьан уччву гаф даринхъа! Му гаф гьеебхьиган кIваз мани ва рази шулу. БицIири сабпи ражну дубгъру гаф «дада» ву. Дада ихь уьмриъ варитIан гирами, аьзиз кас ву. Гьарсар дадайиз чан велед гизаф ккунду. Дугъу велед бадали думу гьам бицIиди имишра, гьам аьхю гъахьишра зегьмет зигуру. Дадайин ккунивалин, ширинвалин, ужувлан кьадар адар. Веледдизра чан дада зат кIваълан гьархну ккундар. Фицики? Дада гьарган чан веледдин гъайгъушнаъ шулу. Дада кьаби гъашиган, веледди думу гьюрмат, уж’вал апIури дюрхну ккунду. Гьарсар веледдин чан дада гьарган кIваъ гъузру. Велед гизаф шадди шулу, чан дада разиди гъяркъган.

Дадайин уьмрин метлеб «фу ву?» гъапиш – велед аьхю апIуб ва дугъан хал ккебгъуб ву. Дугъу ухьу бицIидихъанмина дюн’яйихъди ва яшаишдихъди таниш апIуру. Дадайи ухьуз ужуб улупури, харжиб ярхла апIуз чалачмиш шулу. Узузра дадайи гизаф ужудар ляхнар улупунзуз. Узуз йиз дадайи аьхюдариз гьюрмат, бицIидариз кюмек, кьабидариз уж’вал апIин гъапнийи. Дугъу гъапнийи: «Инсанариз, гъуландариз уж’вал, хайир хуру кас духьну ккунду».

Узу дадайиз кюмек апIури шулза. Думу ляхнарихъ хъуркьри адруган узу рюкьяч-гъаб жабкIуз, мургул йивуз, марццишин апIуз кюмек апIури шулза. Ва дадайира узуз гъагъи вахтна кюмек апIури, насигьят туври шулу. Йиз дада дюн’яйиъ варитIан ужур ву. Гьаз гъапиш, дугъу узу бадали аьхю зегьмет зигура. Чухсагъул увуз, жан йиз багъри дада!

Дада

Дюн’яйиъ варитIан ужур
Ву йиз дада, агъязуз.
Гьарган гъвалахъ шулва
дада
Аьхю икрам вуйиз увуз.

Чухсагъул увуз, жан дада
Узу хъади гъягъюрайи.
Багьа вузуз яв гьарсаб гаф
ВаритIан ужур ву йиз дада.