Ерли жягьтлуваларин 59 проект гъалиб гъахьну
Гюльнара Мягьямедова
Вахтназди вице-премьерин вазифйир тамам апIурайи Руслан Аьлиевди республикайин муниципалитетарин «Ерли жягьтлувалар» проектдин конкурсдин комиссияйин заседание кIули гъубхну.
«2019-2026-пи йисари проект уьмриз кечирмиш апIури, 3,5 миллиард манатдин кьадарнаъди, гьадму гьисабнаъди республикайин бюджетдианра кади, 584 проектдиз кюмек тувна. Думу проектар жямяаьтлугъдин, машинар гъягъру рякъярин, бицIидариз тамшир апIру майднар ачмиш апIбан, спортдин объектар арайиз хпан гьякьнаан муниципалитетари теклиф гъапIдар вуйи», – гъапнийи Аьлиевди.
Дагъустандин экономикайин ва жиларин арт-миш’валин министерствойи 2027-пи йисаз конкурсдиъ иштирак шлударин аьрзйир кьабул дапIна. Гъалибчйир баллар дивбан бинайиинди гъядягъна.
2027-пи йисан проектар уьмриз кечирмиш апIбаз республикайин бюджетдиан 250 миллион манат улупна.
Конкурсдиз республикайин 32 муниципалитетдиан 89 аьрза гъафнийи. Натижайиъ республикайин 23 муниципалитетдиъ уьмриз кечирмиш апIру 59 проект гъалиб гъахьну.
2019-пи йисхъан башламиш дапIну, Табасаран райондиъ «Ерли жягьтлувалар» программайин дахилнаъди ужудар проектар кIулиз духна. Гьаму 2026-пи йисан гъалиб гъахьи проектарин дакьатарихъ райондин Жулжуниф ва Кьулиф гъуларин арайиъ, Ярса ва Зил гъуларин арайиъ айи рякъяр рас гъапIну. Райондин кIулиъ айи Мягьямед Къурбановдин гафариинди, 2027-пи йисазра муниципалитетдиан 6 проект улупна. Думу проектарикан гьеле фундар гъалиб гъахьнуш, ашкар дапIнадар.
Газатдин гъюру нумрйириъ дурарикан мялуматар тувдича.