Дюн’яйиъ, фикир гъапIиган, артмиш шулайи наслариз илим ва тербия тувувал варитIан баркаллу пише ву. Жиниб дар, ужур мялимди хайлин дюшюшариъ мектебариъ урхурайи баяр-шубариз дадана адашра эвез апIуру.

Имамат Аьшурбегова (Митарова) Хив райондин Гъвандик гъулаъ мялимдин хизандиъ бабкан гъахьну. Дугъан адаш, 15 йисан багъри гъулан мектебдиъ директорди лихбан кьяляхъ, тазади тешкил дубхьнайи Сюгют гъулаз удучIвну гъягъюру. Ужуб тажруба айи мялимди душваъ гьадму вахтна гъулан ккергъбан мектебдиъ урхурайи баяр-шубариз илим тувбан ляхин башламиш апIуру.

Имамат Аьшурбеговайин уьмрин ва зегьметнан рякъ ккабалгбаъра му улупбари асас роль уйнамиш гъапIну. Мектеб ужудар аьгъювалариинди ккудубкIу жигьил шуру илимдин рякъ ДГУ-йин чIаларин факультетдиъ давам гъапIну. Аьгъювалар гъадагъурайи йисари думу зегьметнан рякъ ккабалгбан гъайгъушнаъра гъахьну: 1993-пи йисан Имамат Сюгют гъулан бегьем дару мектебдин ккергъбан классарин мялимди кьабул апIуру. Хъа 2013-пи йислан мина думу чав зегьмет зигурайи мектебдиъ завучди лихура. Гьаци, Имамат Аьшурбегова чан юкIв хъайи пишейин эйси гъахьну.

«БицIидариз урхуз-бикIуз улупувал – йиз уьмрин метлеб гъабхьну. Гъийин деврин образованиейин цирклиъ шулайи дигиш’валариз фикир тувиш, гьамус мектебдиъ мялимарихьнара, бицIидарихьнара вуйи тIалабар артухъ духьна. Гьарсар бицIирихьна вуйи уьмуми рафтар ккабалгбаъ аьхю мяна а, фицики живанарин уьмрихьна вуйи лигбар, гъиллигъар варидарин сабсдар дар»,

– кIура Имамат Аьшурбеговайи.

Думу юкьур веледдин дада, хъа гьамус бабра ву. Хизан ва мектеб дишагьлийин уьмрин бахт гъабхьну. Имамат Аьшурбегова 8-пи мартдин машкврихъди тебрик апIури, дугъаз мюгькам сагъ’вал, кIван шадвал ккун апIурхьа!