Гьямд ибшри ташбигьвал адру сар Аллагьдиз, Учв Халикь вуди, инсаният, варитIанна гирамиди халкь дапIну, жилариина халифади деркку ва Учв рази шлу гъиллигъар инсаниятдиз кьисмат гъапIу.
Тарих кIваин уьбхювал – гьамусяаьт яшамиш шулайи ва яшамиш гъахьи ихь аьхю абйирин дугъри гьякьикьат ву. Уьмур фици хъапIну ккундуш ваяки чпи фици хъапIнуш, жвув’ин али вазифйир фици тамам дапIну ккундуш, илим ахтармиш дапIнайи ваяки кIваантIан Аллагьдиз ибадат апIурайи яшлуйири гизаф разиди, аьшкьниинди ктибтури шулу.
Улихьнаси узу машгьур билиг айи касариинди, шейхариинди, аьраб чIал аьгъю аьлимариинди машгьур гъабхьи Зилдккарин гъулан агъсакъал, гьацI аьсриътIан артухъ имамвалин вазиф-йир тамам апIурайи аьхю гьярфналан имам, тяжублу кас, чан фидакар ляхниинди аьхю гьюрмат гъазанмиш гъапIу Аьбдусемед Недурмягьямедовдихъди (шиклиъ) гюрюшмиш гъахьунза.
ХьуцIур йистIан артухъ вахтна имамвал апIурашра, Аьбдусемед Недурмягьямедович ужур имам хьувал, гьюрмат гъазанмиш апIувал, жвув нумунади улупувал гъуллугънан йисарикан асиллу дарувалиин инанмиш ву. Дугъан фикриинди, гьюрмат гъазанмиш апIувал асас вуди гьарсар касди чан гъуллугъ лайикьлуди тамам апIбакан, жвуву туврайи насигьятарикан ва гъул-жямяаьтдихьна, жвуван тарихдихьна вуйи ккуниваликан асиллу ву. Зилдккарин яшлуйири, сар-сарихьна гъягъюри, гъулан тухмар аьмалназ гъюбкан, дурарин тарихнакан, наслиан наслиз гъиту савкьатарикан, диндин шартIарикан фици ктибтури шуйиш, дугъан гъира кIваин илми.
Аьбдусемед Недурмягьямедович-дин гьунар асас вуди машкврин йигъинжагъариъ, яшлуйирин мажлисариъ, хялар ва дустар уч духьнайи йишваъ ялавлу ву. Табасаран ва Хив районариъ думу Зилдккарин Семедси машгьур ву.
Гъунши гъулариъ Аьбдусемед Недурмягьямедович гьацира мусурман диндикан шиърар дикIру, дурар аьхю устадвалиинди урхру кассира машгьур ву. Думу тюрк, фарс, аьраб ва азербайжан чIалар аьгъю, табасаранарин тарихдиан жюрбежюр ихтилатар ктитру ва зигьимлу, гьякьлу инсанар ва уьмур ккуни кас ву. Дугъу Тюркистандин Сулеймандин табасаран чIалназ таржума дапIнайи, Мягьямад Пайгъамбар (с.а.в.) дюн’яйилан аьхиратдиз гъягъюваликан кадабгънайи риваятди Аьбдусемед Недурмягьямедовдиз яратмиш апIбан рякъюъ аьхю бажаранвал айиваликан шагьидвал апIура. (Думу риваят газатдин ургубпи машнаъ туврача).
