«Майин машкврин йигъарра кади, Урусатдиъ дилихру йигъар 11-пи ма-йизкьан давам хьиди», – къайд гъапIну Урусатдин Федерацияйин Президент Владимир Путинди талат йигъан губернаторарихъди вуйи гюрюшдиъ.

 

Президентдин Указ гьарган лихурайи тешкилатариз, аптекйириз, медицинйин идарйириз, жара вахтназ гъитуз даршлу тикилишчивалин ляхнар тамам апIурайи компанйириз, ипIру-убхъру сурсатар масу туврайи туканариз, финансарин тешкилатариз кайиб дар.

Гьюкуматдин кIулиъ айири къайд гъапIганси, эпидемияйи экономикайиз, бизнесдиз гизаф гъагъи тясир гъапIну.

«Хусуси дилаварчйириз, бицIи компанйириз, гьадму гьисабнаан йисариинди чпи гъазанмиш гъапIуб, чпин жафа ва зегьмет туву хизандин карханйириз, жвуву жвуваз ляхин абгури лихурайи ватандашариз гизаф аьхю читинвалар алахьну»,

– гъапну Владимир Путинди ва мицдар касариз гьюкуматдин терефнаан кюмекнан хил гьачIабккуз гаф тувну.

Урусатдин Президентди жвув имбударихьан жара апIбан къайда давам апIбакан ва диди экономикайиз туврайи зарарнакан дерин гьяйифвалиинди гъапнийи. Амма, дугъу къайд гъапIганси, ватандашарин уьмур ва сагъ’вал варитIан важиблу ву.

«Вуйибси пидиза: гьамусяаьт инсанарин гъайгъушнаъ дархьувалин, дурар чпиз кьабул вуйиб апIури гъитувалин теклифар апIурайидари инсанариз вягьшивалихъна хътакувал ккун апIура», – дупну, Владимир Путинди «кюгьне Спартайикан» кьиса ктибтнийи: думу кюгьне вахтари сакьат бицIидар гъарзлан итри гъахьну.

Уьлкейиз ватандашар ляхнихъди тямин апIбан, агьалйирин гъазанжар за апIбан ва экономика артмиш апIбан милли план лазим ву, къайд гъапIну аьхириъ Владимир Путинди. Дугъу бизнесдиз ва ватандашариз кюмек тувбан цIийи къайдйирин гъварч 5-пи майиз гьязур апIруваликан гъапнийи.

Коронавирус тарабгъувализ аьксивал улупбан совещаниейиъ РФ-дин сагъламвал уьбхбан Министерствойин кIулиъ айи Михаил Мурашкойи ватандашарикан майин машкврар къайд апIуз багахьлуйирихьна, дустарихьна хяларди дурушувал, хизанариъ айи аьхю яшнан агьалйирин сагъламвал уьбхбахьна вари жигьиларикан жавабдарвалиинди янашмиш хьувал ккун гъапIну.