Табасаран эскрар – Ватандин Аьхю дявдин иштиракчйир
Мягьямедхан Агъасиевич Гьяжиев
Табасаран райондин ТинитI гъулаъ бабкан гъахьну. Дяви ккебгъайиз улихьна Мягьямедхан юкьуд йисан Советарин Армияйиъ Севастополиъ гьюлин флотдиин ватанди чан улихь дивнайи буржи тамам дапIну дуфну амийи.
Мягьямедхан бицIивахтнахъан мина чан таярихьан ижми хасиятниинди, чан ляхнарихъан жаваб тувуз ва, учв гьякь вуш, чан гафниин дийигъуз аьгъювалиинди тафавутлу шуйи. Дугъу инсан ужуз апIру гафар ва ляхнар сабра кьабул апIури гъахьундар.
Ватандиин душман алархьну кIуру хабар гъеебхьубси жигьил лейтенант дишлади Ватан уьбхюз гъушну. Дявдин чюлиъ Ватан бадали жан гьяйиф дарди гъабхурайи женгназ, чахъди хъайи эскрарик — дявдин дустарик гучI дарапIбан гьевес капIувализ, чан хусуси дирбаш’вализ лигну, Мягьямедхан Гьяжиев швнуб саб ордендиинди ва медалиинди лишанлу гъапIнийи.
Сталинград душмандихьан азад апIру гъати женгариъ ихь ватанагьли, 87-пи гвардейский стрелковый дивизияйин ротайин командир, лейтенант Мягьямедхан Гьяжиевдиз гъагъи зийнар гъахьнийи. Госпиталиан думу багъри гъулаз гьаъну.
Дявдин ва дявдин кьяляхъ йисари Мягьямедхан Гьяжиев Табасаран райондиъ заан гъуллугъариъ гъилихну. Дугъан дугъриваликан, намуслуваликан вари райондин агьалйириз мялум вуйи. Му касдихьна, теклиф, насигьят ккун апIури, райондин хайлин ватандашар илтIикIури гъахьну.
