Табасаран эскрар – Ватандин Аьхю дявдин иштиракчйир

Багьаудин Гьясанович Байрамов 

1928-пи йисан Табасаран райондин Хючна гъулаъ бабкан гъахьну.

 

16 йисан яшнаъ ади думу чан хушниинди дявдиз гъушнийи. Разведкайин дестейиъ гъуллугъ апIури, дагълу бай хайлин шагьрар душмнарихьан азад апIбаъ иштирак гъахьну.

Берлиндиз хъуркьайиз 7 километр манзил амиди, пияда кьушмариз къаршу вуйи мина гъутIубкIган, дидин хайлин парчйир куркIну зийнар гъахьи Багьаудин Байрамов госпиталиъ дахъну. Дугъан ликриъ, жандин жара паяриъ минайин 11 жут тикйир гъузнийи, ва думу дявдин 2-пи группайин инвалид гъахьнийи.

Немцарихъди вуйи женгариъ улупу кIубанвализ лигну, дугъаз саб хайлин медаларра («Дирбаш’вал улупбаз лигну», «1941-1945-пи йисари Ватандин Аьхю дявдиъ Германияйиан гъалибвал гъадабгъбаз лигну» ва гь.ж.) айи, Сталиндихьан чухсагъул мялум апIбан кагъазра гъафнийи.

Дявдин кьяляхъ думу райпойин складдин заведующийди лихури гъахьну.