Табасаран эскрар – Ватандин Аьхю дявдин иштиракчйир

 

Аьгьмед Мурадялиевич Мурадялиев

1910-пи йисан Табасаран райондин ЧIвурдаф гъулаъ бабкан гъахьну.

 

Дявдиз 1942-пи йисан гъушну. Фашистарихъди вуйи женгнаъ гъюниз зиян дубхьнайи эскер немцари йисирвализ гъадагъну. Сакьюдар йигъарилан Аьгьмед Мурадялиев зийнар духьнайи немцарин офицерар гъахурайи аьрабайиъди, жиниди Уьру Армияйин партизнарихьинди гьергру. Думуган эскриз «Дирбаш’вал улупбаз лигну» медаль тувну.

Аьгьмед Мурадялиев, багъри жил душмандихьан азад апIури, Берлиндизкьан гъушнийи. 1945-пи йисан июлин 23-пи йигъан думу дявдиан кьяляхъ гъафнийи.

Аьгьмед Мурадялиевдиз «1941-1945-пи йисари Ватандин Аьхю дявдиъ Германияйиин гъалибвал гъадабгъбаз лигну», «1941-1945-пи йисари Ватандин Аьхю дявдиъ баркаллу зегьмет зигбаз лигну» медалар айи. Ветеран 1962-пи йисан уьмриан гъушну.