Табасаран эскрар – Ватандин Аьхю дявдин иштиракчйир

 

Шихнеби Шихбабаевич Шихбабаев

1920-пи йисан Табасаран райондин Сиртич гъулаъ бабкан гъахьну.

 

1942-пи йисан мартдин вазлиъ дугъаз Советарин Армияйиз дих гъапIну. Армияйиз гъягъяйиз, Шихнеби Шихбабаев Табасаран райондин ВКП(б)-йин РК-йиъ лихури гъахьну.

1942-пи йисан мартдин вазлилан декабрин вазлизкьан Тбилисийин артиллерияйин мектебдиъ дурхну, дугъу тупчивалин пише гъадабгъну, ва Шихнеби Шихбабаев 75-пи стрелковый дивизияйин 34-пи полкнаъди Ирандиз гъуллугъ апIуз гьаъну. 1944-пи йисан дугъу дявдин альпинизмдин мектебра ккудубкIну. 1943-пи йисхъан мина КПСС-дин член вуйи. 1942-пи йисхъан мина 1946-пи йисазкьан, лейтенантдин звание ади, армияйин жергйириъ гъуллугъ гъапIну. Дявдин гъуллугънаъ жавабдарвал улупбаз дилигну, Шихнеби Шихбабаевдиз «1941-1945-пи йисари Ватандин Аьхю дявдиъ Германияйиин гъалибвал гъадабгъбаз лигну» ва хъана жара медалар ади гъахьну.