12-пи май – вари халкьарин медицинайин сестрайин йигъ
Йигълан-йигъаз вари дюн’яйиъси, Дагъустандиъра коронавирусдиан аьзарлу гъахьидарин кьадар артухъ шула. Гьаддихъди сабси, кечмиш шулайидарин гьисабарра кьяляхъ гъузрадар.
Гъийихдарин арайиъ, цIийи вирусдин инфекцияйиз сабпидарди аьксиди гъудужву, амма дидин улихь зяиф вуйи медицинайин вакиларра гизаф а. Гъийин йигъаз анжагъ саб Дагъустандиъ медицинайин цирклиан 30-тIан артухъ гъуллугъчйир гъагъи пневмонияйиан кечмиш гъахьну.
Духтрар, медсестрйир, санитаркйир – мурарикан гьарсар кас, чпин гъуллугънан буржи тамам апIури, аьхиримжи нефес хътабгъайизкьан, иццурайи инсанариз кюмек апIуз чалишмиш шули гъахьну, амма хъуркьундар. Дурари, жарадарин уьмур уьбхюрча кIури, чпин уьмур тувну. Анжагъ дурарин гьунарар бязи ихь ватандашариз рякъюрадар. Аьдат вуйиганси, духтрарин ва медицинайин сестрйирин терефназ харжи гафар кIурударра хайлин а. Дурар медицинайин вакиларин пишекарвалин дережа исди вуйиваликан, гьюкуматдин терефнаан медицинайин гъуллугъчйириз дюз дарди аьлава пулар жара апIурайиваликан, сагъламвалин циркил лап зяиф дубхьнайиваликан улхура. Амма, гьаз-вуш тянкьидчйири гъи му къурхулу тIягъвнихъди сабпи гъагъи женг гъабхурайидар духтрар ва медсестрйир вуйиб затра гьисабназ гъадабгъурадар. Дурар, йишв-йигъ дарпиди, суткйириинди, чпин уьмур гьяйиф дарапIди, рягьятвал, хал-хизан, веледар кIваълан гьархну, ихь уьмур аьжал хру уьзрихьан уьбхюз вари мумкинвалар агури, лихура. Духтрар ва медсестрйир гъийин деврин игитар ву. Ухьу дурарин пишекарвалин заан дережайихъ хъугъну ккунду. Чпиз айи читинвалариз дилигди, дурари уьлкейин гьарсар ватандашдин уьмрихъан жавабдарвал гьисс апIура.
Гьар йисан 12-пи майиъ гизаф уьлкйириъ вари халкьарин медицинайин сестрайин йигъ къайд апIури шулу. Гьадму йигъан медсестрйири тебрикнан мани гафар, кюкйир, пешкешар кьабул апIури ва саки вари сагъ’вал уьбхбанна профилактикайин идарйириъ му йигъахъди тялукь вуйи шадлу серенжемар гъахури шулу. Хъа цци Дагъустандиъ бязи медицинайин сестрйириз пишекарвалин баркаллу ляхин гъабхбаз чухсагъулин мани гафар гъеерхьундар. Дурар, улихьна йисариси, чпин ляхнин юлдшарихъди сатIиди машквар къаршуламиш апIуз учра гъахьундар. Инсафсуз уьзри дурар ихь арайиан гъухну. Хъа гьамусяаьт жарадарин уьмур бадали женгнаъ айи имбу медицинайин вакилариз, инсанарин уьмур коронавирусдихьан азад апIури, машквар улубкьуваликанра хабар гъабхьундар.
Гьюрматлу ич чйир! Учу учву вари халкьарин медицинайин сестрайин йигъахъди кIваантIан тебрик апIурача. Гьаму гъагъи вахтна учву гъабхурайи баркаллу зегьметназ чухсагъул. Му пишекарвал анжагъ рягьимлу юкIв айи, жара касдин дерд ва хажалат жвуванубси гьисс апIру, гъайгъу зигру касдихьантIан ктабгъуз шулдар. Гъит учвузра уьмриъ анжагъ ужуб юкIв айи инсанар алахьри!
