Коронавирус уьзрихъди уьлкейиъ арайиз дуфнайи гьякьикьатди, жиниб дар, агьалйирин яшайишра гъагъи дережайиз гъюз гъибтра. Фицики хайлин ватандашар, ляхнин йишвар хъяркьбахъди аьлакьалу вуди, хизандин игьтияжар фици гьуркIруш мюгьтал духьна.
Гъуларин гьякьикьат фикриз гъадабгъну, асас пай жигьилар, ерли йишвариин ляхин адрувал себеб дубхьну, саб вахтна гъазанмиш апIуз гъирагъдиз гъягъюз мажбур гъахьну. Гьелбетда, дурарикан сар-кьюризра гъурабатдиъ хусуси хулар адар, дурар кирайихъ жарарин хуларикк яшамиш шула. Хъа гъи, карантин мялум дапIнайиган, дурар саки вари шагьрариан гъулариз кьяляхъ хътакну гъапиш, ягъалмиш шулдар. Тялукь аьгьвалатнаъ дурар гьелелиг яшлу абйир-бабарин пенсияйин дакьатарихъ яшамиш хьуз мажбур шула. Урусатдин Президентди му жигьатнаан хизанариз кюмекар тувуз кьабул гъапIу жюрбежюр уьлчмйири аьгьвалат цIибди вушра пучIу апIрувалик умуд киврухьа.
Аьхиримжи вахтна, уьлкейиъ арайиз дуфнайи аьгьвалат фикриз гъадабгъну, ухьухь жюрбежюр рягьимлувалин фондари чпин ляхин жанлу дапIна. Йишвариин агьалйириз яшайишдин саб жерге кюмекар тувбан гъаразнаъ айи гъуллугъарихъди сигъ аьлакьайиъ ади, дурари яшайишдин читин шартIариъ айи хизанариз ипIру-убхъру сурсатарин кюмекар тувра.
Гьаци, улихьна йигъари «Марцци юкIв» рягьимлувалин фонднан кюмекниинди Хив райондин жюрбежюр гъулариан вуйи 25 хизандиз итIру сурсатар жара гъапIну. Кюмек апIруган, дурари асас вуди 65 йистIан артухъ яшнаъ айи ватандашариз, сакьат бицIидар айи хизанариз эгьемият тувну.
Дидиз улихьна, дупну ккундуки, тялукь кюмекар «Инсан» рягьимлувалин фонднан терефнаанра, Хив райондин жямяаьтлугъдин кьувватариинди тялукь акция гъабхбан натижайиъ волонтерарин терефнаанра жара дапIна.
Аьлава апIурза, игьтияж айириз кюмек тувувал – инсанвалин асас лишан ву.
Арайиз дуфнайи читин аьгьвалатнаъ улупнайи вахт-наз рягьимлувалин ляхин гьарсар касди, чан удукьувалариз лигну, тамам апIура. Сари пулин кюмек тувра, тмунури рягьимлу, умун гафниинди, шубурпир хушниинди духтрариз кюмекназ гъюра.
Гьюрматлу ватандашар! Коронавирус уьзур себеб дубхьну, арайиз дуфнайи аьгьвалатнаъ сифте нубатнаъди сабур апIинай! Гьарсаб мучIувалин аьхириъ акувалра шули аьдат ву. Ичв гъуншдиъ, гъулаъ касибвал кайи хизан аш, юкIв ачухъ дапIну, учвхьан шлу кюмекнан хил гьачIабккай. Уж’вали уж’вал арайиз хуру. Яшлуйири кIуруганси, аьзиз Аллагьди гьюрмат апIру хил ичIиди гъидрибтур!
