Табасаран райондиъ коронавирусдин улихьишв бисбан ва думу яркьуди тарабгъуз гъидритбан оператив штабдин начальникдин заместитель Аьбдулгьялим Гьялимовди мялум гъапIганси, му уьзур удубчIвхъан мина гъубшу вари вахтна Табасаран райондиъ дид’ан 8 кас аьзарлу гъахьну, дурарикан 4 кас больницайиъ ими, хъа 2 кас сагъ гъахьну.
Мидланра гъайри, 13-пи майиз вуйи улупбариинди, муниципалитетдиъ пневмония уьзур кади 77 кас гьисабназ гъадагъна, дурарикан 52 кас сагъ хьуз больницайиъ дахъна, 14 кас сагъ гъахьну, хъа 6 кас гъийихну.
Аьбдулгьялим Гьямидовди гъапиганси, Багьаудин Аьлиевди, Хючнаъ рибчрайихъ хъайи чан хусуси гостиница обсерваторияси ишлетмиш апIуз ЦРБ-йихьна тувна. Гьамусяаьт душваъ 50 касдиз йишварра гьязур дапIна, духтрарра а. Уьмумиди гъадабгъиш, райондиъ, Хючнаъ айи ЦРБ-ра кади, резервдиъ 105 аьзарлу дахъру йишвар а.
Табасаран райондин аьтрафариин полицияйин отдели гюзчивалин 8 пост дивна. Душвариин, хул’ан удудучIвди гъузбан тIалабар чIур апIбаз лигну, гьамусдиз 300 шофёрариина протоколар ацIна. Гьацира райондин гъулариъ айи инсанарира гъуларизди учIвру рякъярихъра гюзчивал гъабхру касар дерккуз хъюгъна.
«Дупну ккундуки, дилаварчи касарира гизаф бицIидар айи хизанариз, инвалидариз ва читин гьялнаъ айи жара ватанагьлийириз кюмекнан хил гьачIабккура.
Мисалназ, устаз Исамудин эфендийин терефнаан «Умуд» фондну ва Табасаран райондин жигьиларин центри 1200 касдиз ипIру-убхъру сурсатарихъди кюмек гъапIну. Сенатор Сулейман Керимовди итIру сурсатар айи 100 гъварч, Дербент шагьрин агьали Руслан Исаевди – 50 гъварч хътаъну. Дагъ.Огни шагьриан вуйи уста Шамиль халуйи 100 агъзур манатдин кюмек апIбанди ву. Табасаран райондин 33-пи нумрайин рякъяриз лигру АО-йин начальник Эседуллагь Аьбдуллаевди 100 шишал хю пай гъапIну. Табасаран райондин бицIидарин яратмиш апIбан хулан (МКДОУ) кIулиъ айи Умият Маллакъурбановайи, чан ва чпин коллективдин терефнаан, игьтияж айидариз пай апIбан бадали, 700 маска гьязур гъапIну. Гьацира «Юлдаш» ЦО-йи ва Хючнаарин сабпи нумрайин мектебдира маскйир дирхури а. Казахстандиъ яшамиш шулайи ихь ватанагьли Гьяжибег Аьлибеговра лазим вуйи кюмек апIуз гьязур ву. Госдумайин депутат Ризван Къурбановдин кюмекчи Рустам Бегеринди райондин ЦРБ-йиз хусуси метлеб айи палатдин 50 гъварч хътаъну, хъа Табасаран райондиъ айи гьюкуматдин страхование апIру тешкилатдин начальник Мирзакерим Аьбдуллаевди хусуси метлеб айи палат, мас-кйир ва жара лазим вуйи шей’ар масу гъадагъуз кюмек гъапIну.
Табасаран райондин имам, «Ас-салам» газатдин редактор Ансар Рамазановди лап читин уьзрариан гъийихдар накьварик кивуз, хусуси метлеб айи палатра алди, 6 касдикан ибарат вуйи бригада гьязур дапIна.
Табасаран райондин улихь-кIулихь хьайидари, мистарин имамари, гъуларин советарин главйири, инсанарихьинди илтIикIну, гьамцдар тIалабар апIура: хул’ан удудучIвувал, хулариз дармнар йивувал, хилар-машар дижикIну, лазим вуйи дармнарихьди дурар вирусарихьан марцц апIувал, салмариз 6 кастIан артухъ уч дархьувал, райондиан ва рес-публикайиан жара йишвариз дурушувал»,
– къайд гъапIну Аьбдулгьялим Гьялимовди.
