Ихь гьюкуматдиъ коронавирусдин уьзур гьяракатниинди тарабгъуз хъюгъиган, уьлкейиъ арайиз дуфнайи читин аьгьвалатназ лигну, Урусатдин Президент Владимир Путинди апрелин аьхириан майин 12-диина, маважиб гъибтну, дилихру йигъарси къайд гъапIну. Гьаму йигъарин арайиъ хайлин инсанар лап читин гьялнаъ ахьну, фицики саб манат гъюру йишв адру касариз, наънан хьибдихъа?!

Улихьнаси Москва шагьриъ яшамиш шулайи, Табасаран райондин Имшнигъ гъулан агьали, вари дюн’яйиз машгьур спортсмен, рекордсмен ва Госдумайин депутатдин кюмекчи Рустам Бегеринди чан хусуси дакьатарихъ Москвайиъ яшамиш шулайи, читин аьгьвалатнаъ айи 60-тIан артухъ хизанариз ипIру-убхъру сурсатарин кюмек гъапIну.

 

Гьамусяаьт инсанарси, коронавирусдин уьзур кубчIвнайи аьзарлуйир кьабул апIурайи больницйирра читин гьялнаъ а. Дагъустан Республикайиъ уьзур тарабгъурайивалихъ инсанар хътругъри, хулаъ деъну гъудрузувал себеб дубхьну, гъи ухьухь лап читин гьял арайиз дуфна. Больницйир коронавирусдиан иццру гъахьи мукьан инсанар кьабул апIуз гьязур духьнадар. ИкибаштIан, больницйириъ ишлетмиш апIру чарасуз лазим вуйи шей’ар бегьемди адрувализ лигну, хьалкьари пулар уч апIури, дурар масу гъадагъурайиб гъябкъиган, ихь ватанагьлийихьанра ярхлади гъузуз гъабхьундар.

Рустам Бегеринди, чан жягьтлувал улупну, сад-кьюд йигъандин арайиъ чан ва хъанара жара меценатарин кюмекниинди, 1 миллионна 300 агъзур манат дакъатарихъ больницйириз чарасуз лазим вуйи, уьзур кубчIвбахьан уьрх- ру хусуси халатар ва хъанара жара шей’ар масу гъадагъну, Дагъустандиз хътаъну. Гьадму гьисабнаъди Табасаран райондин кьялан больницайизра 200 агъзур манатдин шей’арин кюмек гъапIну. Му касди гьамциб кюмек апIбаз лигну, гъи Табасаран райондин больницайиъра медицинайин чарасуз лазим вуйи шей’ар гьелелиг гьуркIну а.

Багъри Ватан читин вахтна кIваълан гьадрапIрайивализ, Рустам, «Табасарандин нурар» газатдин редакцияйин терефнаан увуз аьхю чухсагъул кIурача. Гъит, яв кIваъ айи хиялар бегьем ишри.