Майин 12-пи йигъан вари халкьарин медицинайин кьялан пишекрарин йигъ къайд гъапIну. Улихьна йисариси дарди, цци духтрарикан лапра артухъ улхурахьа, фицики дюн’яйиъ коронавирусдихъди аьлакьалуди арайиз дуфнайи читин аьгьвалатнаъ, му къурхулу тIягъвнихъди аькси женг гъабхури, варитIан улхьан жергйириъ айидар ихь духтрар ва дурарихъди больницйириъ лихурайи кюмекчи медсестрйир ву.

Гьацдар медсестрйирикан сар Жвулли гъулаъ бабкан гъахьи Чинара Шафиевара ву. Жвул’арин кьялан мектеб ккудубкIган, Чинара Шамиловна Дербентдиъ медицинайин училищейик урхуз кучIвру. Му училище хъуркьувалиинди ккудубкIну, думу Дербентдиъ бицIидарин больницайин реанимацияйин отделениейиъ медсестради лихура. Чинара Шамиловнайин гафариинди, дугъан терефнаан лизи халат хъайи инсанариз – духтрариз, думу пишейиз гьарган гьюрмат ади гъабхьну. Гьаддиз мектебдин кьяляхъ шуру медучилищейик урхуз кIучIвуз кьаст гъапIнийи.

«Му пише ктабгъувалиин гьич сабанра швумал гъахьундарза. Аьзарлуйириз узхьан шлу кюмек, гьюрмат апIуз гьарган гьязур вуза. Ляхниъ, пишейин вазифйир тамам апIури, фукьан вушра гъагъиди аьзарлу духьнайи бицIидариз хъайивал апIувал алабхъуру. Хъа ляхниъ адру вахтнара дих гъапIу касдиз кюмекнан хил гьачIабккуз гьязур вуза. Думу йиз буржйирикан вуди гьисаб апIураза»,

– къайд гъапIну ич сюгьбатнаъ Чинара Шафиевайи.

Хъа гьамусяаьт, вари духтрар коронавирусдихъди женгнаъ айи вахтна, ихь уьлкейин больницйириъ сарикан тмунурикна тарагъру уьзрарин духтрар гьуркIрадар. COVID-19 уьзур кубчIвнайи аьзарлуйирихъди лихурайи гизаф духтрар чпира аьзарлу гъахьну, гьяйифки, гъийихдарра а. Му ихь медицинайиз аьхю зарар ву. Гьаци вушра, духтрарихьан аьзарлуйириз хъайивал дарапIди гъитуз шуладар. Фу чара дапIнура, иццру духьнайидар сагъ дапIну ккунду. Духтрарин вазифа – аьзарлуйиз кюмек апIувал ву. Гьюкуматдин, сагъламвал уьбхбан министерствойин кIулиъ айидари агьалйирикан хулариъ гъузувал, сумчрар-саламариз гизаф инсанар уч дархьувал ккун гъапIнийи. Амма ихь халкьдихьан, гизафси да-гъустанлуйирихьан, сар-сарихьна дурушди гъузуз гъабхьундар. Гизафдар уьзур дуфнайивалихъ хъугърира адайи. Гьамус, багахьлуйир йихуз хъюгъиган, гьюкуматдиз, духтрариз агьрар апIури, социалин сетариъ а. Гьаму аьгьвалатнаъ, дявдин вахтна фронтдиз гьаъруганси, медицинайин вари пишекрар коронавирусдиан аьзарлу духьнайидар айи больницйириз нубатчивализ гьаъбанди гъахьну. Гьелбетда, кIваъ намуслувалин жавабдарвал айи Чинара Шафиевара кьяляхъ гъузундар.

«Ич заведующий Хидир Фейзуллаевич Сайфаев кIулиъ айи десте апрелин 22-пи йигъан нубатчивализ гъафнийча. ЙицIуд йигъандин арайиъ зат хулаз дурушди, больницайин айитI гъузунча. Аьзарлуйирихьна гъягъруган, ликарилан хъюгъну кIул’инакьан сабди вуйи, вирусдихьан мюгькамди уьрхру халат алабхьуйча, улар, ушв, хъюхъ ижми апIуйча. Хилариинра кьюб жюре элжгар алахьуйча. Гьаму жюрейин палатдиккди 6 сяаьтна лихуйча, хъа йирхьуб сяаьтналан учу гьюдюхюз жара десте гъюйи. Ич десте, хулаз дурубшди, больницайин саб хулаъ 12 сяаьтна рягьятвал гъадабгъури гъубзуйи.

Узу больницайиъ лихури магьа 30 йистIан артухъ вуйиз, фукьан вушра гъагъи аьзарлуйир гъяркъюнзуз, хъа мициб аьламат гьамусдиз дябкъну адайзуз. Аьзарлуйирин кьадар аьхюб вуйи. Гизафдар лап гъагъи гьялнаъ айи. Дурарихъди ляхин апIуз лапра гъа-гъиди алабхъуру. Сарихьна кюмекназ жаргъурва, тмунури кюмек ккун апIури гьарай апIуру. Хъа варитIан читинуб – увкан кюмек ккун апIурайидариз рягьятвал тувуз дархьувал ву. Узу гъилиху Дербент шагьрин кьялан больницайин провизорный госпиталиъ ляхин ужуди албагнайи. Дармнарихъди тяминвалра ужуб вуйи, пневмония ади аьзарлу духьнайидар сагъ апIуз вари мумкинвалар ишлетмиш апIурайи. Вушра гьеле ихь уьлкейин, гьацира вари дюн’яйин аьлимарихьан му уьзриз аькси дарман адабгъуз дубхьнадар», – ктибтнийи Чинара Шафиевайи.

Узу сюгьбат гъабхру вахтна Чинара Шамиловна, нубатчивалар ккудукIну, 12 йигъан чан хулаъ карантиндиъ айи. Дугъаз уьзрин гъагъивал дябкънайи.
Нубатчивалариан дуфну шубудпи йигъан дугъан бедендин температура за гъабхьну. Фукьан мюгькам палат алабхьнушра, вирус духтрарихьнара гъюру. Саб гьяфтайин арайиъ думу уьзрихъди женгнаъ гъахьну. Жандин температура 39-40 градусдиина удубчIвури, ипIрубдихьна затра иштагь адарди, жандиъ кIул за апIуз аман адарди гъахьну.

Дявдин вахтна зийнар духьнайидариз хъайивал апIрудариз «рягьимлувалин чйир» кIури гъахьну. Гьамусяаьт ихь медсестрйирира гьациб ляхин тамам апIура: аьзарлуйирин кIван, рюгьнан ва жандин аьзаб яваш апIура.

Гьюрматлу Чинара Шамиловна, «Табасарандин нурар» газатдин редакцияйин коллективдин терефнаан уву яв пишекарвалин машкврихъди тебрик апIурача. Гъит Аллагьди увуз ва яв хизанариз мюгькам сагъ’вал туври, яв баркаллу ляхниъ хъуркьувалар ишривуз, хизандиан гьюрмат ва берекет кам дарибшрияв.