Айниса Аьлиева 1963-пи йисан 3-пи июндиъ Табасаран райондин ЦIурутIил гъулаъ аьхю ва албагу хизандиъ бабкан гъахьну. Дугъу 1979-пи йисан ЦIурутIларин миржид йисандин мектеб ккудубкIну, хъа 1982-пи йисан – Хючнаарин заочно урхру мектеб. Гьадму йисан Айниса Аьлиева Ростовдиъ медучилищейик урхуз кучIвру, ва 1985-пи йисан хъуркьувалиинди думу ккудубкIну, гъийин йигъазкьан Табасаран райондин ЦРБ-йиъ бицIидарин отделениейиъ аьхюнур медсестради лихура.
Айниса Аьлиевайиз бицIидихъан мина духтирвалин пише кьабулди вуйи, ва гьаддиз думу гьаму метлеблу пишейин эйсира гъахьну. Му тажрубалу медсестрайи, гьар йигъан Акъа гъул’ан Хючназ гъюри, ляхин апIура. Му пишекрин ляхниз кьан апIувал, аьзарлуйир чаз ккилигури гъитувал адар, аьксина вуди, дугъу чахьан удукьрукьан аьзарлуйириз медицинайин кюмек апIура.
Айнисайиз бицIидарин чIал аьгъя. КетIерццнайи бицIир чахьна хьади гъафиган, дугъаз гъилигубси, бицIир сагъ апIуз фу лазим вуш, дугъу кIури шулу. Айнисайи бицIидариз ширин, уччвудар гафар апIури, дурарихъди дишлади мани аьлакьйир тешкил апIуру. Гьамди думу чан пишейин эйси вуйивал улупура. Фунур вушра бицIирихъди дишлади ужудар аьлакьйир арайиз хуз анжагъ устадвал кайи пишекарарихьантIан удукьруб дар.
Чан ляхникан улхури, Айниса Аьлиевайи гьамци гъапнийи: «Узу бицIидар гизаф ккунир вуза. Гьаддиз йиз пишейиан тажруба гъадабгъбан рякъра бицIидар сагъ апIбан отделениейиъ лихбалан ккебгъунза ва гъира душваъ лихури имиза. Аьзарлу духьнайи бицIир сагъ апIуз серенжемар кIули гъахувал думукьан рягьят ляхин дар, фицики гафар апIуз дубгъайиз ктIерццу бицIирихьан чан фу иццуруш духтриз пуз шулдар. Духтриз, дицир бицIир фтиан иццураш тяйин дапIну, думу сагъ апIбан рякъяр агувал алабхъуру. Думуган духтир гъалатI дархьиди, бицIир сагъ апIбан серенжемар кIули гъахуз буржлу ву. БицIидарин уьзрарикан улхуруш, узу му отделениейиъ лихуз хъюгъну имбу йисаритIан гьамус арайиз удучIвнайи уьзрарин жюрйир артухъ духьна. Мисалназ, гьамусяаьт юкIв вая гъурдлар иццру хьувалиан нефс бисру уьзур, келлейин давление, сахарный диабет, бронхит, пневмония ва жара уьзрар кайи бицIидар гизаф хурачухьна. Келлейин давление за шлу уьзур кайи бицIидари сабпи йишв бисура гъапишра, кучIал даршул.
Ич отделениейиъ бицIидар сагъ апIуз лазим вуйи вари дармнар а. Чпин сагъламвал сагъ апIури, отделениейиъ дахърайи бицIидарин кьадар, гьяйифки, йислан-йисаз артухъ шула».
Пишекарвалин машкврихъди тебрик апIури, Айниса Аьлиевайиз инсанарин сагъламвал уьбхбан гъаравлиъ хьуз жандин мюгькам сагъ’вал ва ляхниъ хъуркьувалар ккун апIураза.
