Хьадукран эвелариан башламиш дапIну, жямяаьтлугъдик сикинсузвал кипнайи коронавирус уьзур тарабгъбаз аьксиди гъахурайи серенжемар йи-швариин жанлу дапIнашра, гьяйифки, му рякъюъ аьзарлуйир Хив райондиъ йигълан-йигъаз артухъ шула.
Хив ЦРБ-йин кIулин духтир Агъамягьямад Нурмягьямедовди субут апIурайиганси, улупнайи вахтназ дурари, коронавирус уьзур каш ахтармиш апIувал метлеб вуди, 190 касдин тялукь пробйир анализдиз хъадаъна. Дурарикан 26 дюшюшдиъ коронавирус уьзур лабораторйириъ тасдикь гъабхьну.
– Зиихъ улупнайи 26 дюшюшдилан савайи, гьамусяаьт Хив райондиъ вирусдин пневмония кайи 23 дюшюшсан ашкар духьна. Аьзарлуйириз лазим вуйи кюмек тувбан метлебниинди ЦРБ-йин бицIидар хру отделениейиъ («уьру» зона) 20 аьзарлуйиз дахъру йишвар ади госпиталь гьязур гъапIунча. Аьзарлуйириз кьюб дес-тейин дахилнаъди, гьар 6 сяаьтнак дигиш шули, нубатнахъди духтрари гъуллугъ апIура. Душваъ лихурайи сагъламвал уьбхбан пишекрариз яша-йишдин шартIар бицIидарин отделениейиъ («марцци зона») яратмиш дапIна.
Мушваъ гьацира гьямила дишагьлийириз гъуллугъ апIбан гьякьнаан суалар туврударра шулу. Жаваб тувурза: чарасуз вуди бицIир хури читин гьялнаъ айи дишагьлийир кьабул апIбан метлебниинди больницайиъ саб кабинет ккабалгнача.
Хъа вушра, райондин гьямила дишагьлийирихьна илтIикIури, пуз ккундузуз: аьхиримжи вахтназ ккилигури, хулаъ мугъузанай. ЦРБ-йиъ тялукь гъатар шагьрариз гьаъбан серенжемар гъахура.
21-пи майиз вуйи улупбариз асас вуди, коронавирус ва вирусдин пневмония уьзрариан Хив райондиъ уьмуми гьисабариинди 49 аьзарлу мялум дапIна. Дурарикан 13 касди Хив ЦРБ-йиъ сагъламвал мюгькам апIура. Уьзриан гъагъи гьялназ дуфнайи 12 кас республикайин саб жерге шагьрарин госпиталариз гьаънача. Духтрарин гюзчиваликк- ди чпин сагъламвал хулаъ мюгькам апIурайи коронавирусдиан аьзарлуйир улупнайи вахтназ райондиъ адар.
Уьзрин цIийивализ лигну, жиниб дар, гьелелиг духтрариз думу сагъ апIбан рякъюъ хайлин читинвалар алахьури ими. Хъа беден жара уьзрариан зяиф дубхьнайи дюшюшариъ аьзарлуйиз кюмек тувуб хъана гъагъиди алабхъура. Гьаци, апрелин эвелариан му уьзриан райондиъ 4 кас (3 – COVID-19-диан, 1 – пневмонияйиан) кечмиш духьна. Дурариз аьксина 5 касди, улупнайи уьзрарихьан сагъ духьну, гъи чпин багърийирин арайиъ уьмур давам апIура.
Сагъламвал мюгькам апIбаъ, уьзур сагъ апIбаъ вахтниинди лазим вуйи кюмек тувувалира аьхю роль уйнамиш апIура. Халкьдин аьдатариинди уьзур сагъ апIури, вахтназ гьирифбаз аьхю хатIа а. Гьаддиз, гьюрматлу ватанагьлийир, уьзрин писвал аннамиш дапIну, ихтиятвал уьбхяй! Участокдин духтриз ичв сагъламвалин аьгьвалатнакан вахтниинди хабар тувай! Вахтниинди учвуз туву кюмекну ичв сагъламвал ва уьмур уьбхюз мумкинвал тувди.
Дидланра савайи, райондиъ коронавирус уьзур тасдикь гъабхьи ватандашарихъди аьлакьайиъ гъахьи, му уьзриан читин аьгьвалат айи жюрбежюр регионариан гъулариз дуфнайи 141 ватандаш духтрарин гюзчиваликк кка. Дурарикан гьарсари 14 йигъандин муддатнаъ карантин уьбхювал чарасуз лазим ву», – къайд гъапIну А.Нурмягьямедовди.
ЦРБ-йиз кюмек туву гьарсариз чухсагъул
ЦРБ-йин кIулин духтри субут апIурайиганси, улупнайи вахтназ дурар аьзарлуйириз лазим вуйи кюмек тувбан рякъюъ лазим дармнарихъди, духтрарин сагъламвал уьбхбан бадали лазим шлу алатарихъди тямин ву. Гьелбетда, агьалйири карантиндин къайда уьбхбаъра аьхю мяна а, фицики аьзарлуйир гизаф хьпахъ гьам дармнариз, гьамсана духтраризра игьтияж гьисс апIбан хатIа хьибди.
– Дугъриданра, улихьнаси ЦРБ-йиъ саб жерге читинвалар гьис апIури гъахьну. Хъа му месэлйир ихь ватанагьли Сабир Насуровдин кюмекниинди гьял гъапIну. Коронавирус уьзур райондиъ жанлу шулайи гьякьикьатдиъ хайлин ихь ватандашари больницайиз жюрбежюр кюмекар тувна. Дурарин арайиъ «Хивский район» МО-йин администрацияйин вакилар, узу зиихъ улупнайи дилаварчи Сабир Насуров, РД-йин Халкьдин Собраниейиъ Хив райондин агьалйирин маракьар уьрхюрайи депутатар Нариман Асваров ва Марат Асланов, республикайин жюрбежюр шагьрариъ зегьмет зигури, амма багъри ватандихъан юкIв убгурайи ватанперверар Шакир Насуров, Камиль ва Артур Мустафаевар, Имам Сяидов, Шамсудин, Замир ва Аким Гьяжимурадовар, Иса Кьасумов, Аьбдулгьяким Нежефов, Велихан Мирзаханов, Замир Пашаев, Велибег ва Рамазан Гьямзаевар, Адипаша ТIайибов, Казим Гьяжиагъаев, Тагьир Урдиханов, Азим Аьбдулагъаев, Шамиль Аьбдуллаев, Хив райондин дишагьлийирин Советдин председатель Зумрия Сеидягьмедова, Кьасумкент гъул’ан вуйи дилаварчи Максим Аскеров, ЧIилихъар гъулан вакил Жабраил Бейбалаев, Лика гъулан вакил Раида Рамалданова, райондин имам кIулиъ ади диндин вакилар а.
Гьелелиг инсаниятдиз таниш дару му къурхулу уьзрихъди арайиз дуфнайи читин гьякьикьатдиъ кюмекнан хил гьачIабкку гьарсар касдиз йиз ва райондин жямяаьтдин терефнаан чухсагъул пуз ккундузуз. Хъа агьалйирикан нубатнан ражну ихтиятвал уьбхювал ккун апIурза.
