Магьа Гирами Рамазандин ваз ктабхъуз лап цIиб вахттIан имдар. 2020-пи йисан коронавирусди инсанарин аьдати уьмур ва машкврар къайд апIувал дигиш гъапIну. Урусатдин Президент Владимир Путинди, уьлкейин мусурмнарихьна илтIикIну, гьамусяаьт тарабгънайи вирус хъана артухъди тарабгъувализ манигъ’вал апIбан бадали, Ураза-машквар къайд апIури, мистариъ сатIи вуйи гъудгнар тешкил дарапIувал, накьварихъна садакьа хьади дурушувал, машквар хулаъ къайд апIувал, багахьлуйирихьна дурушувал ва дурариз жвувахьнара теклиф дарапIувал ккун гъапIну.
Дугъриданра, уьлкейиъси, ихь республикайиъра COVID-19 уьзур тарабгъувалихъди гъагъи аьгьвалат арайиз дуфна. Гьаддиз учура учвкан, Президентдин, духтрарин теклифар кьабул дапIну, хулариан удудучIвувал ккун апIурача. Гьамус саки гьарсаб хулаъ интернет а. Машквран йигъан телевизориан машквран гъудгнин прямой трансляция хьибди. Мистариъ имамари аьдат вуйиси гъудган апIиди, дурари гъудган апIруган, арайиъ лазим кьадар манзил уьбхиди. Хулаъ интернет айириз гьадму гъудгниъ сатIи хьуз мумкинвал хьибди.
Дюн’яйин вари мусурмнари Первердигар Аллагьдикан ислягьвал, саламатвал ва гьаму ухьу гъи айи читин аьгьвалатнаан шлубкьан ухди удучIвувал, аьзарлу духьнайидар сагъ хьувал ккун апIурхьа.
Жара йисариси, ццира ихь ватандашар кюмекнан хил гьачIабккуз, уж’вал апIуз гьязур вуйивал гъябкъюнхьуз. Дицисдар ляхнари ухьу вари кIваантIан шад апIура.
Гьюрматлу мусурман чвйир ва чйир! «Табасарандин нурар» газатдин редакцияйин коллективди учвуз ихь улубкьурайи аку ва гирами машквар кIваантIан мубарак апIура. Ичв гъидису ушвар, туву садакьйир, гъапIу гъудгнар ва дюъйир Аллагьу Тяаьлайи лап багахьди кьабул апIрийичв.
Гъит ичв хизанариъ гьарган мюгькам сагъ’вал ибшри, юкIвариъ шадвали ва саламатвали агъавал апIри, суф-райихъ гьарган берекет ибшри, хушбахтлу уьмрин эйсйир ишричву!
