Йишвариин кьабул апIурайи серенжемариз дилигди, гьяйифки, гьелелиг вари Урусатдиъси, Хив райондиъра коронавирус уьзур кьяляхъ йивура пуз ухди ву. Фицики аьзарлуйирин кьадар аьксина йигълан-йигъаз артухъ шула. Гьяйифки, кечмиш шулайидарин сиягьра яркьу шула.
Сагъламвалин цирклиъ лихурайи вакилар – духтрар, медсестрйир, санитаркйир – чпин пишекарвалин дережайиз дилигди вари гъуллугънан буржи тамам апIури, аьзарлу духьнайи ватандашариз кюмек апIуз чалишмиш шула.
Гьаци вушра, гьяйифки, гъийин читин вахтна коронавирус уьзур, гьякимарина духтрари чпин хайирназ адабгънайи кучIал ву дупну, тянкьид апIурайидарра ихь арайиъ гъузра. Тялукь гъатариз сагъламвалин вакиларин гьяракатарра гьунарси, икибаштIан, рякъюрадаршул. Му месэлайикан аьхир адрубкьан улхуз шулу, хъа гъийин макьалайиъ узуз Хив ЦРБ-йиъ COVID-19 уьзур кайидар кьабул апIуз гьатIабццнайи госпиталиъ аьхиримжи кьюб гьяфтайиъ, йишв-йигъ дарпиди, суткйириинди, чан уьмур гьяйиф дарапIди, рягьятвал, хал-хизан, веледар кIваълан гьархну, агьалйирин уьмур аьжал хру уьзрихьан уьбхюз вари чан удукьувалар ва мумкинвалар сарф гъапIу медсестра Замиля Нурмягьямедовайикан улхуз ккундузуз.
Хиварин уьмуми образованиейин мектеб ккудубкIу шуру 1989-пи йисан илим ва пишекарвал гъадабгъбан рякъ Каспийск шагьрин медучилищейиъ давам апIуру. 1991-пи йисан улупнайи училище заан аьгъювалариинди ккудубкIу жигьил пишекар Хив ЦРБ-йиз участокдин медсестради ляхниз кьабул апIуру. Гьадму йислан мина дугъу ЦРБ-йиъ, гъуллугънан йишвар дигиш апIури, амма халкьдиз вафалуди, зегьмет зигура. Аьхиримжи йисари Замиля Нурмягьямедовайи ЦРБ-йин инфекцияйин отделениейиъ гъуллугъ апIура. Заан категория айи медсестрайиз сарпи жергйириъди коронавирус кубчIву аьзарлуйириз гъуллугъ апIубра кьисмат гъабхьну.
– Му пис уьзур гъи гьарсариз цIийивал гъабхьну, гьаддиз читинваларра артухъ гъахьну. Сагъламвалин пишекрари зегьмет зигура, хъа дурарин пишекарвалин дережа тянкьид апIури, улхру ватандашарихьна илтIикIури, пуз ккундузуз: гъудуркьу пишекрар Хив ЦРБ-йиъ а, хъа рюгьнан кьувват варидарин сабсиб шули аьдат дар. Чиб-чпи рюгьламиш апIбаъ ухьу сар сариз кюмек духьну ккунду. Анжагъ гьацитIан ухьхьан му уьзриин гъалиб хьуз удубкьидар.
Гъи Хив райондиъ коронавирусдихьди ва вирусдин пневмонияйихъди вуйи аьгьвалат, агьалйирин вижнасузвализ лигури, къайд апIурза, читинуб ву. Стационариъ аьзарлуйириз лазим вуйи кюмек тувбан натижайиъ сагъ духьну, хулаз гъушу ватандашарра а. Вушра му уьзур варидарин беденарихьан сабси тюбгъюзра удубкьурадар. Тялукь аьгьвалатнаъ сар кас кечмишра гъахьну.
Уьзур сагъ апIбаъ вахтниинди лазим кюмек тувували аьхю роль уйнамиш апIура. Гьамусяаьтра гъулариъ гизафдар иццура. Аьдати грипп ву дупну, духтрарихьна илтIикIурадар. Уьзур гъагъи дережайиз илтIибкIуз хъюбгъиган, больницайиз жаргъуру. Арайиз дуфнайи аьгьвалатнаъ гьарсар ватандашди жавабдарвал гьисс апIбаз аьхю мяна а.
Госпиталиъ айи шартIарикан, уьмуми аьгьвалатнакан гъапиш, лазим алатарихъди, дармнарихъди тямин ву. Жикъи муддатнаъ ЦРБ-йин кIулин духтри чав душваъ лихру вакилариз яшайишдин лазим вари шараитар яратмиш гъапIну.
Учу кьюб бригадайин дахилнаъди, гьарсаб 6 сяаьтнак гьюдюхюри, зегьмет гъизигунча. Дарпиди гъитуз шулдар: учу му гъагъи аьгьвалатнаъ зегьмет зигбахьна рюгьламиш гъапIу гьарсар ич ляхнин гъарашугъдиз чухсагъул мялум апIураза. Фицики дурари учу ипIру-убхърубдихъди тямин апIбан жигьатнаан сад йигъанра эгьемият тутруври гъитундар. Аферин гьарсариз! – гъапнийи Замиля Нурмягьямедовайи.
