Гьамусяаьт Табасаран райондиъ саспи гъуларин рякъяр рас апIувалин ляхнар гьяракатниинди кIули гъягъюра. «ХатIасуз ва ужуб ерийин рякъяр» милли проектдин дахилнаъди, райондин мяна айи Хючна–Халагъ рякъюк кабхърайи Гьесихъ гъулазди гъябгъру рякъ «Дорстройтех» ООО подрядчик – тешкилатди чан кIул’ина дибисну, рас апIура.
Рякъяр рас апIбан проектдин пландиъди улупнайиганси, 6 метр манзилнан рякъ 8 метриинакьан яркьу ва дюз дапIну, кIекIел алабхьну ва мархьар гъургъиган шид гъябгъру турбйирра ккирчну гьязур апIиди.
Табасаран райондин администрацияйин пресс-гъуллугънаан тувнайи мялуматариинди, рякъяр рас апIбан ляхнар мартдин вазлитIан ккергъна ва гъийин йигъаз рякъ яркьу апIбан, дюз алапIбан ляхнар аьхирихъна дуфна. Гъубзрайиб 16 сантиметр ягълишин кIекIел алабхьну, думу тялукь техникайихъди чIабкIуб ву. Гьамусяаьт рякъ’ин 18 аьдад хусуси техникайи ва 27 касди ляхин апIура.
Гьаму рякъюхъди сабси, расвалин ляхнар райондин Цалак гъулан Закир Мягьямедовдин ччвурнахъ хъайи кьялан кючейиъра гъягъюра. Мушваъ гьар ражари мархь убгъбан кьяляхъ, мархьлин штар гъягъювал себеб дубхьну, рякъюъ ичIар, гъунар арайиз гъюра, жилиан гъванар итIигъура. Гьаддиз, му рякъюъди машинар хъаъну гъягъюрайидар, гъулан агьалйир гизаф ражари чахьна илтIикIурайивализ лигну, райондин глава Мягьямед Къурбановди «Дагестанавтодор» ГКУ-йикан рякъ рас апIуб ккун апIбиинди, 700 метр манзил рякъюн расвалин ляхнар апIуз хъюгъна.
Къайд дапIну ккундуки, рас апIурайи гьаму кючера Хючна-Халагъ рякъюк кабхърайи, заан гъулар райцентрихъди кдикьурайи рякъ ву. Айи мялуматариинди, му рякъюн сану пайниин асфальт улубзбан бадали вуйи документарра цци гьязур апIиди.
Расвалин ляхнар фици гъягъюраш лигбан бадали улихьна йигъари дина райондин глава Мягьямед Къурбанов ва «Табасаранское ДЭП №33» карханайин начальник Эседуллагь Аьбдуллаев гъушну.
Расвалин ляхнар гъахурайидарихъди сюгьбатнаъ Мягьямед Къурбановди къайд гъапIганси, планламиш дапIнайи ляхнар августдин аьхириз ккудукIиди. Му метлебназ федералин бюджетдиан 54 миллион манат жара дапIна.
«Рякъ рас дапIну либхуз кипувалиинди «сельсовет Джульджагский» гъулан поселениейин гъуларин агьалйириз чиб-чпихьна машинариъди гъягъюз хайлин рягьят хьибди.
Дарпиди гъибтуз шулдар, райондин бюджетдин дакьатарихъди, гьамусяаьтна Гьесихъ-СертIил рякъ’инра расвалин ляхнар кIули гъягъюра.Гьаму ляхин апIбиинди, кьюб-шубуб гъуларин поселенйирин агьалйирихьан саб читинвалра адарди транспортдиъди чиб-чпихьна гьягъюз хьибди»,
– аьлава гъапIну райондин главайи.
