Ватандин Аьхю дявдин 75 йисан юбилейиз
Ватандин Аьхю дявдиъ гъалибвал гъадабгъбак чпин лайикьлу пай фронтдиъ немец чапхунчйирихъди женг гъабхури гъахьи эскрариси, далу терефнаъ айтIан душмнар – тIафлар ва армияйиан гьергнайидар тIанкь апIури гъахьи НКВД-йин ва милицияйин гъуллугъчйирира кивну. Гьадрарикан сар Хюрикк гъулан агьали Гьяжи Гьясанов вуди гъахьну.
Гьяжи Фейзуллаевич Гьясанов 1918-пи йисан Табасаран райондин Хюрикк гъулаъ нежбрин хизандиъ бабкан гъахьну. Ватандин Аьхю дявдин йисари гъачгъар тIанкь апIру батальондин женгчи вуди, думу гъачгъарихъди ва Табасаран райондин ругариин къайда чIур апIру жара дестйирихъди женг гъабхбан серенжемариъ жанлуди иштирак гъахьну. Гьяжи Гьясановдилан ва дугъан юлдшарилан хъял алдабгъуз гъачгъари гизаф гьяракатар апIуйи. Дурарин хизанаризра къурхувал ади хьпаз лигну, бандитарихьан хизанар уьрхбан бадали, батальондин женгчйирин хулариин милицияйин гъуллугъчйир дерккри гъахьну.
Гъачгъарихъди женг гъабхбан серенжемариъ жанлуди иштирак хьпаз ва думу ляхниъ гъазанмиш гъапIу хъуркьувалариз лигну, Гьяжи Гьясановдиз командованиейин терефнаан ччвурнахъан вуйи женгнан яракь пешкешди тувну. 1943-пи йисан, гъачгъарихъди гъабхурайи женгнаъ ва жямяаьтлугъ уьмриъ апIурайи жанлу гьяракатариз лигну, думу ВКП (б)-йин жергйириз кьабул апIуру ва партияйин заан школайиз урхуз гьаъру. Курсар ккудукIну гъафи, Гьяжи Гьясановдиз, Табасаран райондин КПСС-дин райкомдин тешкиллувалин отделин инструкторвалин вазифйир тамам апIувал табшурмиш гъапIнийи. Чан гъуллугънан вазифйир нумуналуди кIулиз адагъури, Гьяжи Гьясанов 1946-пи йисазкьан партияйин райкомдиъ гъилихну.
Дугъан тешкилатчивалин бажаранвалар гьисабназ гъадагъну, райондин кIулиъ айидари хъасин Гьяжи Гьясанов, райондин гъулан мяишат ликриин апIбан бадали, гъулан мяишатдин цирклиз гьаъру. Гьаци, гизаф йисари дугъу ХустIил, Гурхун гъулариъ колхоздин председателвалин вазифйир тамам гъапIну. 1962-пи йислан мина Гьяжи Гьясановди багъри Хюрикк гъулаъ Чкаловдин ччвурнахъ хъайи колхоздиъ регьбервал гъапIну. Учв лихури гъахьи колхозар дугъу райондин улихь хьайи мяишатарин жергйириз адаури гъахьну. Колхозар совхозариз илтIикIиган, сифте «Хучнинский», хъасин «Кужникский» совхозариъ жюрбежюр гъуллугъариъ гъилихну.
Чан уьмрин юлдаш Муминатдихъди Гьяжи Гьясановди ургур велед (4 бай ва 3 риш) аьхю ва тербияламиш гъапIну. Дурар, чпин абйирин гьюрмат уьбхюри, ляхнин вазифйир нумуналуди тамам апIури, райондин ва республикайин жямяаьтлугъдинна политикайин уьмриъ лайикьлуди иштирак шула, архйирин инсанвалин дережайин, рюгьнанна эдеблувалин ирс хъана заан дережайиз адабгъура.
