Ватандин Аьхю дявдин 75 йисан юбилейиз
Магьа Ватандин Аьхю дявдиъ гъалибвал гъадабгъну, 75 йисра улдубчIвну.Дюн’яйиъ коронавирусдин уьзур тарабгънайи аьгьвалатназ лигну, уьлкейин Президентди му важиблу гьядисайиз бахш вуйи дявдин парад июнь вазлин 24-ди къайд апIбан мясляаьт адабгъну. Гьаму йисан «Аьжалсуз полкнан» акция интернетдиъ онлайн къайдайиинди гъубшну. Акцияйиъ иштирак хьуз ккуни 2 миллиондилан зина ватандашари аьрзйир тувну. Ватандин Аьхю дявдиъ иштирак гъахьидарин суратариз лигбан бадали кьюб гьяфтакьан вахт лазим ву.
Ватандин Аьхю дявдиъ гъалибвал гъадабгъну фукьан йисар ккудучIвишра, дявдин учIврушин яваш шлуб дар. Дявди миллионариинди жигьил эскрарин уьмрар гъухну, хъа гизафдар дявдиан кьяляхъра гъафну. Дявдиз душну кьяляхъ гъафидарин арайиъ Мирзакерим Керимовра айи.
Мирзакерим Керимов 1922-пи йисан Табасаран райондин Жвулли гъулаъ бабкан гъахьнийи. Багъри гъулаъ 4-пи класс ккудубкIну, бегьем дару кьялан образование гъадабгъуз Хив райондин Гъвандикк гъулан мектебдиз урхуз гъушнийи. Дяви ккебгъиган, балин 18 йистIан дайи. 1942-пи йисан Мирзакерим Керимов ватан уьбхюз чан хушниинди дявдиз гъушнийи. Думу дявдинна гьюлин кьувватарин жергйириъди КIару гьюлин флотдиз гъуллугъ апIуз гьаънийи.
1943-пи йисхъан мина 1945-пи йисазкьан дявдин гимийиъди, Новороссийск, Севастополь, Одесса, Керчь шагьрар фашистарихьан азад апIбан женгариъ иштирак гъахьну. Му шагьрариз игит шагьрарин ччвурар тувна. Хъа думу шагьрар азад апIбан женгарин иштиракчйир хъана аьхю игитар ву. Одесса бадали женгар гъахурайи вахтнаъ гъагъи зийнар духьну, Мирзакерим Керимов хайлин вахтна госпиталиъ дахъну. Сагъ гъахьир, хъана гимийиина гъуллугъ апIуз гъушнийи. Дугъу чан гъуллугъ дяви ккудубкIбан кьяляхъра давам гъапIнийи. Багъри гъулаз 1948-пи йисантIан кьяляхъ гъафундайи.
Ватандин Аьхю дявдин женгариъ улупу дирбаш’вализ лигну, Мирзакерим Керимов Ватандин дявдин кьюбпи дережайин ордендиинди, «СССР-ин Яракьлу кьувватарин жергйириъ Ватандиз гъуллугъ апIбаз» ордендиинди, «Кавказ уьбхбаз», «1941-1945-пи йисари Ватандин Аьхю дявдиъ Германияйиин гъалибвал гъадабгъбаз лигну» ва жара медалариинди, гьацира гьюрматнан грамотйириинди лишанлу дапIнайи.
Дявдин женгариан гъюбан кьяляхъ ветеран Мирзакерим Керимов гизаф йисари багъри гъулаъ мектебдиъ бицIидариз аьгъювалар ва тербия туври, дявдиъ алахьу читинваларикан ихтилатар апIури, гъилихнийи. Гьюрматлу ветеран 2009-пи йисан рягьматдиз гъушнийи.
