Советарин вахтарихъан мина ихь уьлкейин сагъламвал уьбхбан идарйирин улихь гележегдиъ ватандашарин медицинайин ва дармнарин игьтияжар гьуркIбан, гъабхурайи ляхнин ери ва культура за апIбан, жюрбежюр уьзрарин улихьишв бисбан жавабдар месэлйир дивнийи.
Аьхиримжи 20 йисандин арайиъ му месэлйир гьял апIбаъ, саб терефнаан, хайлин хъуркьувалар а – дармнарин гьясиллувал лапра заан дережайихъна дуфна, аьзарлуйир сагъ апIру заан технологйирин цIийи саягъар ишлетмиш апIуз хъюгъна. Хъа тмуну терефнаан, бязи вахтари духтрари чпин пишекарвалин вазифйир намуслуди тамам дарапIри, аьзарлуйири фукIа тувруш ккилигури, вахтниинди дурариз кюмек дарапIру дюшюшарра алахьуру.
Медицинайин гьарсаб идарайин, гьадму гьисабнаан аптекйиринра, улихь хьайи асас месела – гьарсар ватандашдиз вахтниинди лазим вуйи кюмек тувувал дубхьну ккунду. Агьалйир лазим вуйи дармнарихъди тямин апIбан рякъюъ гъи, мисалназ, хайлин гьюкуматдин аптекйир, хусуси аптекйир ва аптекайин пунктар ачмиш дапIна. Аьзарлуйирихьан душв’ан чпиз духтрари гъидикIу дармнарикан саки 90 процент гъадагъуз шулу. Аптекйириъ ужудар пишекрар-фармацевтар, гизафси дишагьлийир, лихура ва дурари, лазим гъабхьиш, мянфяаьтлу насигьятарра тувру. Дурарин асас вазифа – чпихьна илтIикIу агьалйири духтрин рецепт дарди деетуз ихтияр айи дармнар, аьзарлуйин игьтияжар гьуркIбан бадали лазим вуйи медицинайин алатар, дармнар кайи укIар, хил-лик илибтIуз материалар ва жарадар масу тувувал ву.
Гьяйифки, коронавирусдин инфекцияйихъди аьлакьалу вуди арайиз дуфнайи аьгьвалатну ихь аптекйирин ляхник синих кипуз мумкинвалар тувну. Жикъиди кIуруш, гизаф вахтна аптекйириъ лазим вуйи маскйир ва спирт кайи шей’ар адарди гъахьну. Хъа варитIан писуб – коронавирусдихъди аьзарлу гъахьидар сагъ апIбаъ кюмек шлу саб жерге дармнар шубуб-юкьуб, бязи дюшюшариъ 10 ражари багьа кьиматнахъ масу тувуз хъюгъювал ву. Дюзди кIуруш, итIру сурсатарин кьиматарра саб арайиъ за гъахьнийи, хъа кьандиси дурар айи дережайиз гъафнийи. Дармнарин кьиматар ис шуладар.
Гъи инсанариз му уьзрихъди аьлакьалуди гизаф читинвалар алахьура: шубуб вазликьан хулаъ, саб ляхинра адарди деували гизафдарихьди пулин кьитвал гьисс апIуз гъитну, бязидариз лап гъагъиди алабхъну. Чухсагъул жумарт юкIвар айи касариз ва рягьимлувалин фондариз – дурари уьмрин дережа ис абхъу касариз хайлин кюмек тувну. Гьаму аьгьвалатнаъ инсанари, чпин багахьлуйирин уьмур бадали, фукьан багьа кьиматнахъ вушра дармнар масу гъадагъруб аьгъяди, мици инсафсузди, аьлдяхну кьиматар пуб адмивалин лишан вуйинхъа?! Инсанарин бедбахтвалиинди уч гъапIу гъазанжарикан мянфяаьт шулинхъа? Я думу пуларихъ гъадабгъну гъипIу уьл гьялалуб хьибдин?
