Дагъустан Республикайиъ коронавирусдихъди вуйи аьгьвалат гъагъиб вуйивализ дилигну, Урусатдин Президент Владимир Путиндин тIалабниинди, Дагъустандиз Урусатдин МЧС-диз дахил шулайи Москвайин областдин Ногинск шагьрин кюмек тувру центрин пишекрар гъафну.
Республикайин гьарсаб шагьриъ ва хайлин районариъ Урусатдиан дуфнайи пишекрари дезинфекцияйин серенжемар кIули гъахура. Магьа дурар ихь районаризра хъурхъну. Табасаран ва Хив районариз дизенфекция апIуз гъушу пишекрар районарин главйир Мягьямед Къурбановди ва Ярмет Ярметовди кьабул гъапIну.
Урусатдин МЧС-дин Ногинскдин кюмек тувру 1125-пи нумрайин центрин начальникдин заместитель, капитан Виталий Мищироко кIулиъ ади Табасаран райондиз гъафи къутармишчйирихъди гъабхьи гюрюшдиъ райондин глава Мягьямед Къурбановди райондин аьтрафариин дезинфекцияйин серенжемар гъахуз дуфнайидариз чухсагъул мялум гъапIну ва пишекрари фуну терефнаан хъюгъну ккундуш, план дюзмиш гъапIну. Гьадму пландиинди райондин гъулан поселенйириъ, хъа асас вуди гьадму поселенйирин инсанар уч шлу йишварин дезинфекция апIуз йикьрар гъапIну.
Сабпи йигъан райондиз дуфнайи МЧС-дин пишекрари чпин ляхин Хючна гъулаъ айи администрацияйин дараматдин, райондин кьялан больницайин гьяятарин, бицIидари тамшир апIру майднарин, Гъалибвалин паркдин, МФЦ-йин, КЦСОН-дин, прокуратурайин, Хючна гъулан мектебарин ва жямяаьтлугъ йишварин дезинфекция гъапIну.
Хъа Хив райондикан кIуруш, мина гъафи Ногинск шагьрин кюмек тувру центрин пишекрарихъди Дагъустандин МЧС-дин гъуллугъчйирра хъайи.
Кюмекчйир райондиз хъуркьу сабпи йигълан мина райондин больницайин аьтрафарин, душван багарихь хьайи кючйирин, райондин администрацияйиз дахил шулайи вари идарйирин, мистарин ва паркарин дезинфекцияйин серенжемар кIули гъухну. Хъайигъан кIуруш, Хрижв, Чювекк, АрхъитI ва Ц1инитI гъуларин поселенйириъ, рес-публикайин мяна айи рякъяриъ, автобусариз ккилигури инсанар дийигъру йишварин, заправкйирин ва хъана яшайишдин мяналу жара йишварин, янаки кьюд йигъандин арайиъ райондин аьтрафариин 100 агъзур квадратдин метр жиларин дезинфекция гъапIну.
Ляхнар ккудкIбан кьяляхъ, райондин глава Ярмет Ярметовди, Ногинскдиан Хив райондиз дуфну, гьамциб кюмек гъапIу касариз чухсагъул мялум гъапIну.
Урусатдин МЧС-дин дахилнаъ айи Москвайин областдин Ногинск шагьрин кюмек тувру центриан Дагъустандиз дуфнайи пишекрари дезинфекция гъапIу дарман инсанарин ва гьяйванатарин сагъламвализ тясир дарапIру гипохлорит натрийдин раствор вуйи.
