Гьюрматлу ватанагьлийир! 20-пи июндиъ подпискайин вахт ккудубкIура, гьаддиз учвкан му месэла вахтниинди гьял апIувал ккун апIурача.
Подпискайин вахт ккудубкIурайивализ дилигди, гьарсар агьалийин уьмриъ багъри газатди уйнамиш апIру роль аьхюб вуйивал гьисабназ гъадабгъну, эгер учухъди гъузну ккундуш, учвуз подписка давам апIуз мумкинвал гъибтрача.
Ав, хьадан эвелин гъайгъушнари, жюрбежюр жара себебари шлиз-вуш подписка апIуз манигъ’вал гъапIнушул. Эгер подписка, мисалназ, хьуб вазлиз апIуруш, думу камивал терг апIуз шулучвхьан, Гьаци, дидхъан мина гъузрайи вазаризра подписка апIуз шулу. Анжагъ саб шартI кIваинди гъибтну ккунду: газатар, учву подписка гъапIу вазлин кьяляхъди гъюрайи вазлихъан хъюгъну, гъидичвуз. Хъа подпискайин кьимат, гьелбетда, учву газат гъадабгъру вазаринтIан шулдар. «Табасарандин нурар» газатдиз подписка: 1 вазлиз – 46 манатна 66 кепек, 6 вазлиз вуйи кьимат 279 манатна 96 кепек ву.
Учвкан ккунди айиб анжагъ газатдиз подписка апIувал ву. «Табасарандин нурар» газатди ихь бицIи ватандикан, багъри гъулан тарихдикан, душваъ шулайи гьядисйирикан ва серенжемарикан, яв коллективдикан, гъуншйирикан, майил-мадатарикан яркьуди бикIура.
Газат анжагъ дидиъ лихурайи вакиларинуб дар, думу халкьдинуб ву. Ухьу жара милли газатарин кьяляхъ гъудрузбан бадали, учвура дидик пай кивну ккунду. Сабпиб, подписка апIбиинди, кьюб кIуруб, ичв теклифариинди. Жара халкьарин ва миллетарин улихь ихь халкьдин сабвал ва сатIивал зяиф даршулайивал гьаддиинди улупурхьа. Сабвал айи халкь гьаммишан кьувватлуди ва гьюрматлуди гъубзру.
Подписка апIбаъ учуз идар-йирин гъуллугъчйир, гъуларин поселенйирин администрацйирин вакилар, гъуларин клубариъ, библиотекйириъ, мектебариъ, бицIидарин багъариъ лихурайи касар кюмекчйир духьну ккунду. Подпискайин аьгьвалат ва газатар, журналар урхрударин кьадар, ухьуз варидариз мялум вуйиганси, йислан-йисаз цIиб шула. Улихьганси почтайин отделениейиз дуфну, жвуван аьшкьниинди, жвуваз лазим вуйи газат, журнал капI, кIуру касар, гьяйифки, гьамус цибтIан имдар. Гьаци вушра ухьуз газатдихьан ярхла хьуз затра ихтияр адархьуз. Му газат ухьуз ихь абйир-бабарихьан гъубзнайи, жвуван халкьдин биналу литературайин чIал ву, миллетдин тарих, культура, аьдатар уьрхюрайи багьалу савкьат ву.
Фукьан ухьу чарйир гъизигишра, гьяфтайиъ саб ражари чапдиан удучIвурайи газатар электрондин вая интернетдин дакьатарихъ хътруркьруб аьгъяхьуз. Му аьгьвалатну газатарин мумкинвалариз аьхю тясир апIура. Дурариз муштар-йир цIибтIан дихъури имдар. Фицики газат хилиз рубкьайиз, агьалйириз дидик кайи мялуматар ва хабрар ухдитIан деер-хьнади шулу. Чаз лазим вуйи газатдин, журналин машар дугъу интернетдиан, инстаграмдиан, вацапдиан урхура. Вушра, «Табасарандин нурар» газатдиъ гьич саб жара мялуматарин дакьатариъ адру жюрейин макьалйир урхуз шулу. Редакцияйин коллективди чпи гьязур апIурайи газатдин гьарсаб маш маракьлуб хьувалиин зегьмет зигура.
Гьюрматлу ватанагьлийир! Гъит, ичв хизанариъ сабвалин, сагъ’валин, саламатвалин манишин затра зяиф дарибшри.
