Ктабхъурайи урхбан йис Хив райондиъ 11-пи классариъ урхурайи 114 ва 9-пи классариъ урхурайи 217 выпускникди ккудубкIиди.
КIваин апIуз ккундузуз, COVID-19 уьзри 9-пи классариъ урхурайидар ОГЭ-йин имтигьнариккан азад гъапIну. Хъа 11-пи класс ккудубкIну, вузариъ урхуб давам апIуз ккунидари июлин вазлиъ ЕГЭ тувди. Гьаддиз лигну, ГИА-йин натижйириз ккилилигди, гьаму ваз аьхирихъна гъяйиз, журналариъ айи кьиматариинди инайиинди ацIну, дурариз аттестатар тувди. Яна 11-пи классдиъ урхурайидарин аттестатар тувбаз, муганайизси дарди, ЕГЭ-йин кьиматари тясир апIидар. Сабсан ражари текрар апIураза, цци ЕГЭ анжагъ вузариъ урхуб давам апIуз ният дапIнайидаритIан тувидар. Хъа техникумариз ва колледжариз урхуз гъягъюрайидариз цци ЕГЭ лазим хьибдар.
Гьелбетда, хил`ин али тIубаркьан вари сабсдар дар. Гьаци, Хив райондин ктабхъурайи йисандин выпускникарра тафавутлудар ву. Дурар садар конкурсариан, садар шиърар ктагъбаан, садар урхбаан, садар физкультурайиан, тмундар зегьметнан дарсариан кIубанвал улупдар ва гъалибчйир ву. Ццийин урхбан йис уьру аттестатариинди 9-пи классариъ урхурайи 24 касди ккудубкIиди. Хъа 11-пи классариъ урхурайи выпускникарикан 16 гъизилин медаларин сагьибар хьуз мумкин ву.
Гьаму йигъари думу 16 касди 3 сяаьтна 55 дакьикьайин арайиъ урус чIалнаан вуйи ЕГЭ-йин тестарин табшуругъар гьял гъапIну ва сочинение гъибикIну. Cадариз баллар артухъ апIуз кюмек гъабхьну кIуру, лазим дару гафар дархьбан бадали, ахтармиш апIбан ляхин ккебгъну ккудубкIайизкьан дурарихъди образованиейин отделин начальник Назаряли Тарланов гъузнийи.
Узу Назаряли Аслановичдихьан гъизилин медаларин сагьиб шулайи выпускникарин гьякьнаан гьерхуб-хъерхуб гъапIунза. Дугъан гафариинди, му 16 кас йисандин кьиматарик сабкьан «4» ктарди урхуб ккудубкIдар ву кIури, мектебарин директорари тувнайи уьмуми сиягьдик кайидар ву.
«Вушра, сабсан ражну ра-йондин администрацияйин образованиейин отделин методистарихъди 10-11-пи классариъ дурари урхурайиган гъадагъу гьацI йисандин ва йисандин кьиматар ва гьамус тувнайи ЕГЭ-йин тестар ва сочиненйир ахтармиш дапIну, райондин главайихъди сабси медалистарин гьякьнаан къарар адабгъидича. Умуд кивурхьа, улупнайи кьадар выпускникари чпи муганайиз мектебариъ гъадагънайи аьгъювалар гъазанмиш дапIнайи кьиматариинди ва гьамус тувнайи ахтармиш апIбан ляхнин натижйириинди субут апIиди ва дурар вари гъизилин медаларин лайикьлу сагьибар хьиди»,
– къайд гъапIну чан улхбаъ Назаряли Тарлановди.
Гъит ихь выпускникар чпин кIваъ айи ужудар мурадар-метлебарихъ хъуркьри! Дурариз ужудар рякъяр ва сяътар кьисмат ишри!
