Июндин 8-пи йигъ ихь уькейиъ агьалйирин яшайишдин игьтияжар гьуркIру гъуллугънан пишекрарин Йигъси къайд апIура.
Му пишекарвалин машкврахъди аьлакьалуди узуз газат урхурайидар Каспийск шагьрин яшлу касарин ва инвалидарин яшайишдин игьтияжар гьуркIрайи пишекар, ихь ватанагьли ФатIимат Мягьмадовайихъди таниш апIуз ккундузуз.
ФатIимат Мягьмадовайин му ляхин тамам апIури хайлин йисар ву. Думу РД-йин зегьметнанна яшайишдин артмиш’валин Министерствойиз дахил шулайи Каспийск шагьрин агьалйирин игьтияжар гьуркIу Центриъ 1996-пи йисан медицинайин сабпи отделение ачмиш гъапIхъан мина, гьадушваъ лихура.
«Ич отделениейиъ заведующий ктарди, узухъди кьюрсана медсестрайи ляхин апIуз хъюгънийи. ЦIиб вахтналан центриъ йирхьубсана медицинайин отделенйир ачмиш гъапIнийи ва гьарсар медсестрайин хиликкна 6-7 аьзарлу касар тувнийи.
Центрин медицинайин сабпи отделениейиъ 18 йистIан артухъ вахтна медсестравалин вазифйир тамам апIури, узуз хайлин читин гьялнаъ айи шагьрин агьалйир алахьунзуз. Асас вуди Ватандин Аьхю дявдин иштиракчйириз кюмек апIури гъахьунза. Дявдин вахтари минйир ккадагъури гъахьи жигьил бай, Берлиндизкьан гъушу Щипиловдихьна гъягъюз гизаф хушди вуйзуз. Дугъу гьаммишан чан уьмрикан, дявдин вахтарикан, алахьу читинваларикан ктибтури шуйи. Узу лигурайи имбуну яшлу касарра гизаф кIваз мани касар вуйи.
Узу ляхин апIуз хъюгъру 1990-пи йисар ихь уьлкейиз лап гъагъи вахтар вуйи. Ич хиликк ккайи яшлуйириз читин аьгьвалатнаан удучIвуз психология жигьатнаанра кмиди кюмек апIури шуйча. Саспидариз чпихъди гафар апIру касар дуфну ккунди шуйи. Гьацдарихъди сяътариинди гафар-чIалар апIури дусуйча. Гьадмура саб жюрейин кюмек ву.
Зат гъудужвуз даршлу, читин гьялнаъ айи аьзарлуйирихъди ляхин апIури, дураризра кюмек туври гъахьунза. Таблиз рубар йивури, капельницйир ккиври ва гьаму метлебназ лазим вуйи дармнар дикIури, дурар поликлиникайиан адагъуз гъягъюри, янаки чпихьан гъудужвну апIуз даршлу ляхнар вари учу апIури шуйча.Мидланра гъайри, касиб хизанариз гьюкуматдикан вуйи пулин ва итIру-убхъру сурсатарихъди вуйи кюмек рубкьуз чарйир зигуйча»,
– кIура ФатIимат Мягьмадовайи.
Ич арайиъ гъубшу сюгьбатнаъ ФатIимат Мягьмадовайи къайд гъапIганси, веледари гатIахьну, чпи уьрхюз фужкIа адру яшлу касар гъяркъиган, лап ижми юкIв айи касдизра тясир шулу. Гьацдар касар яшлуйирин хулариз гьаузра яшайишдин игьтияжар гьуркIру гъуллугънан пишекрари кюмек апIура.
18 йистIан артухъ вахтна Центрин медицинайин сабпи отделениейиъ ляхин гъапIу ФатIимат Аьгьмедхановна кьяляхънаси бицIидарин отделениейиъ гъилихну. Мушваъра дугъу асас вуди аьзарлу инвалид бицIидарихъди жюрбежюр процедурйир гъахури, дурар поликлиникайиз, ясана больницайиз хъади гъягъюри ва хулаз душну анализар гъадагъбан вазифйир тамам апIури гъахьну.
Аьхиримжи 4 йисандин арайиъ дугъу яшайишдин игьтияжар гьуркIру гъуллугънан пишекарин ляхин тамам апIура.
1996-пи йисхъан мина Каспийск шагьрин яшлу касарин ва инвалидарин яшайишдин игьтияжар гьуркIрайи Центриъ ляхин апIури, ФатIимат Мягьмадова жюрбежюр конкурсарин гъалибчира ва швнуб-саб грамотайин, премияйин сагьибра ву. Гъит, дугъаз му баркаллу ляхниъ хъанара артухъ хъуркьувалар ишри.
