Умгьанат Сулейманова
28-пи августдиъ Урусатдиъ дявдин медицинайин пишекрарин йигъ къайд апIуру. Пишекарвалин машквар мубарак апIури, узу духтирвалин сяняаьтнан сирар абйирихьан насларихьна туврайи саб табасаран хизандин вакиларихъди гаф-чIал гъапIунза.
Табасаран райондин ТIивак гъул’ан вуйи Аьгьядоварин хизандиз дявдин госпиталариъ эскрарин сагъламвал уьбхбан аьхю тажруба а. Полковник Аьгьядов Мягьямед Къасумович, гьамус рягьматлу, дугъан бай полковник Аьгьядов Аьгьяд Мягьямедович ва худул подполковник Аьгьядов Руслан Аьгьядович уьлкейин дявдин госпиталариъ лихури, хайлин йисар ву.
Аьгьядов Мягьямед Кьасумович 1935-пи йисан ТIивак гъулаъ бабкан гъахьну. Аьгьядоварин хизандиъ айи кьюрид чвйиринра духтирвалин пишейихъ байвахтнаанмина гизаф юкIв хъади гъабхьну. Мягьямед Аьгьядовдин бицIину чве, МутIалиб Аьгьядов Табасаран райондин ТIивак гъулаъ 58 йисан фельдшерди гъилихну ва «Урусатдин Федрацияйин сагъламвал уьбхбан лайикьлу гъуллугъчи» ччвурназ лайикь гъахьну. Мягьямед Аьгьядов, мектеб ккудубкIиган, Мягьяч-гъалайиъ Дагъустандин гьюкуматдин мединститутдиъ урхуз учIвру. Пишекарвалин образование гъадабгъбан кьяляхъ дугъу Камчаткайиъ Советарин армияйиъ эскервалин буржи тамам апIуру ва кьюд йисансан чав гъуллугъ гъапIу частнаъ духтирди лихури гъузру. Хъасин Ленинграддиъ С.М. Кировайин ччвурнахъ хъайи дявдинна медицинайин академияйиъ урхуз учIвру.
Мягьямед Аьгьядов Герма-нияйин, ва гьацира СССР-ин оборонайин министерствойин дявдин госпиталариъ гъилихну. Дугъан ччвур гъира урусатдин дявдин госпиталариъ эскрарин сагъламвал уьбхбан цирклиъ лихурайи духтрари кIваин хури шулу. Чан уьмрин аьхиримжи йисари Мягьямед Аьгьядовди Ростов шагьриъ ерлешмиш дубхьнайи Кафари Кавказдин дявдин округдин 1602-пи нумрайин Окружной дявдин клинический госпиталиъ заведующийдин вазифйир кIули гъахури гъахьну. 1987-пи йисан 7-пи декабриъ 52 яшнаъ айи Мягьямед Аьгьядов, кIван дамарар ккуру духьну, ифдин либхувал хътабтIувалиан кечмиш шулу.
Мягьямед Аьгьядовдиз кьюр велед а: Аьгьяд ва ФатIимат. ФатIимат Мягьямедовна ТIивак гъулаъ дуланмиш шула.
Аьгьядов Аьгьяд Мя-гьямедович 1959-пи йисан ТIивак гъулаъ бабкан гъахьну. 1977-пи йисан багъри гъулаъ мектеб ужудар аьгъювалариинди ккудубкIну, думу Полтавияйин медицинайин институтдик урхуз кучIвру. Юкьубпи курснаан бажаранлу студентди, Горьков шагьриъ ерлемиш дубхьнайи военный мединститутдиан дуфнайи теклифниинди чан урхуб душваъ давам апIуру. Вуз ккудубкIиган, Аьгьяд Аьгьядовдира чан адаш гъилиху дявдин госпиталариъ лихуз хъюгъру – Германияйиъ, Арменияйиъ ва ихь уьлкейин регионарин саб жерге шагьрариъ. 1996-пи йисхъан тина 2009-пи йисазкьан дугъу Ростов шагьриъ айи Урусатдин оборонайин министерствойин 1602-пи нумрайин дявдин клинический госпиталиъ дамарарин уьзрарин хирургияйин отделениейин заведующийди лихуру.
Агьяд Аьгьядовдин ляхнин сабсан тереф къайд апIуб лазим ву: Ростов шагьриъ дамарарин уьзрарин хирургияйин отделение ачмиш апIувал ихь ватанагьлийин гьунар гъабхьну. 2009-пи йисхъан мина дугъу му шагьриъ аьдати больницайиъ дамарарин уьзрин хирургияйин отделениейин заведующийвалра апIура.
2002-пи йисан медицинайин илмарин кандидат Аьгьядов Аьгьяд Мягьямедович, ляхниъ гъазанмиш дапIнайи хъуркьувалариз лигну, медицинайин «Призвание» премияйин сагьибра гъахьну.
Дугъан бай Руслан Агьядовдира чан аьхю абайин ва адашдин ляхин давам апIура. Аьхю абайин шилнаъди душну, дугъу Санкт-Петербургдиъ С.М. Кировайин ччвурнахъ хъайи дявдинна медицинайин академияйиъ заан образование гъадабгъуру. Гъи думу, медицинайин гъуллугънан подполковник, Санкт-Петербургдин дявдинна медицинайин академияйиъ дамарарин уьзрин хирургияйин отделениейин заведующийин кюмекчиди лихура.
Аьгьядоварин хизандиз гьам Урусатдин шагьрариъ айи, гьам ихь республикайин дявдин госпиталариъ лихурайи дявдин ва ватандаш хирургарин арайиъ аьхю гьюрмат а. Аьгьядоварин фамилия гъапиган, дурарихъди таниш вуйи инсанари, дугъриданра, лайикьлу духтрар ву кIури, дурариз тярифнан кьимат тувра.
Дявдин духтрарин ляхин, аьдати духтрариндихъди тевруш, гизаф зегьмет ва жавабдарвал айиб ву, фицики дурариз гюллйирин, минйир тIуркIбан натижйириъ гъахьи зийнар сагъ апIуб, дявдин шараитариъ, жвуван уьмриз хатIара кади эскрар аьжалин бацариан уьчIюгъюб алабхъура.
Гъи ихь ватанагьлийирин терефнаан Аьгьядоварин хизандиз аьхю чухсагъул пуз кккундузуз. Гьамусяаьт Украинайиъ хусуси метлеб айи дявдин операция кIули гъябгъюрайиган, Аьгьядовари ляхин апIурайи Ростов шагьрин эгьемият вари терефариан за дубхьна, фицики мушваъ Урусатдин министерствойин оборонайин Кьибла терефнан дявдин округдин штаб а, Ростовдин дявдин клинический госпиталиъ женгариъ зийнар гъахьи эскрари чпин сагъламвал мюгькам апIура, шагьриантина Украинайиъ айи ихь кьушмариз гизаф дявдин техника ва яракь гъябгъюра. Саб гафниинди, Аьгьяд Аьгьядовдира гъи ихь гележегдин гъалибвалик чан лайикьлу пай кивра, фицики дугъу, чан пишекарвалин аьгъюваларин кюмекниинди гизаф эскрарин уьмрар уьрхюра, дурариз жара терефарихъанра чахьан шлу кюмекар апIура.
Саб хизандиъ шубур медицинайин илмарин кандидатар, дявдин медицинайин гъуллугънан шубур офицерар – кьюр полковник ва сар подполковник – хьувал – му Табасаран райондин аьхю хъуркьувал ва дамагъ ву. Гъит Аьгьядоварин хизан Аллагьди уьбхри ва мицисдар бажаранлу духтрар дурарин кюлфетдиъ артухъ ишри.
Шиклиъ: Адашна бай Аьягьяд ва Руслан Аьгьядовар.
