Гюльнара Мягьямедова
12 йис яшар вуйи Дагъустандин спортсмен, дзюдойиан вуйи чемпионатариъ саб-швнуб ражари гъалиб гъахьи Къизилюрт шагьрин Олимпийский резервдин мектебдин вакил Ашахан Хазанатовди чан уч дубхьнайи пул 14-пи августдиъ Мягьячгъалайиъ гъабхьи завалин натижайиъ зарар гъабхьидарин хизанариз кюмек вуди тувну.

 

Думу пул тувбан бадали, спортсмен «Вари сатIиди» социальный фондназ илтIикIну.
Набалугъ спортсменди учв бабкан гъахьи йигъ къайд апIбан бадали, 120 агъзур манат уч дапIнайи. Амма улхьан йигъан гъабхьи пашман дюшюшди дугъан ният дигиш гъапIнийи.
Фонднан мялуматарин гъуллугъну туврайи хабрариинди, фонднан кIулиъ айи Селимхан Мирзехановди Ашахандин абйир-бабариз ва спортдин мектебдиъ айи тербиячйириз чухсагъул мялум гъапIну.

«Дагъустандин лайикьлу бай тербияламиш гъапIу абйир-бабариз, дугъан тренерариз, мялимариз дериндиан чухсагъул мялум апIураза. Жигьил спортсмендиз цIийи хъуркьувалар, чав чан улихь дивнайи метлебарихъ хъуркьувал ккун апIураза. Учв набалугъ бай вушра, хусуси маракьар ярхла дапIну, рягьимлувалин ляхнихъна гъювал – думу гьюрматназ лайикь ляхин ву», – къайд гъапIну Селимхан Мирзехановди.

КIваина хурача, Дагъустандин региондин «Вари сатIиди» фондну 14-пи августдиъ Мягьячгъалайин гъирагъдиъ машинар рас апIру карханайиъ (автосервисдиъ) гъабхьи тIубкIувалин дюшюшди гъийихдарин ва мал-мутмуйин зарар гъабхьидариз кюмек тувра.

Думу пашман дюшюшдиъ гъийихдарин хизанариз 1 миллион манат, гъагъи ва пчIу зийнар гъахьидариз 400 ва 200 агъзур манат тувну.
Гьацира кюмек тувуз юкIв хъайидарихьан фондну рягьимлувалин кюмек кьабул апIувал давам апIура.