Зубайдат Шябанова
Августдин аьхиримжи йигъари Табасаран райондин Кьалухъ Мирзайин ччвурнахъ хъайи спортдин дараматдиъ Кьур’ан урхбаан бицIидарин ва живанарин арайиъ сабпи конкурс кIули гъубшну.
Конкурс Табасаран райондин глава Мягьямед Къурбановдин, Калуга шагьриъ яшамиш шулайи ихь меценат, «Монолит» ДСК-йин тикилишчивалин компанияйин директор Гьяжимурад Гьяжиевдин ва АО-йин ДСУ-йин Табасаран райондин филиалин руководитель Эседулла Аьбдуллаевдин кюмекниинди, Табасаран райондин администрацияйи тешкил дапIнайиб вуйи. Конкурсдиъ 60-тIан артухъ бицIидар ва жигьилар иштирак гъахьну. Дурар кьюб йишваз: 13 йисаз вуйи бицIидарин ва 14 йислан 17 йисаз вуйи живанарин дестйириз, жара гъапIну.
Конкурсдин иштиракчйири урхурайи Гирами Кьур’андихъ хъпехъуз Табасаран райондин глава Мягьямед Къурбанов, диндин, жямяаьтлугъ тешкилатарин вакилар, иштиракчйирин абйир-бабар ва гъулан агьалйир дуфнайи.
Серенжем ачмиш апIури Мягьямед Къурбановди къайд гъапIганси, Табасаран диндин хайлин машгьур аьлимарин Ватан ву. «Му къайда гъира райондиъ давам шула. Динди жямяаьтлугъ сатIи дапIну ккунду, гьюжатар арайиан адагъну ккунду. Йиз фикриан, Кьур’ан урхрударин конкурс аьдатнаъ абхъди, думу гьар йисан гъабхидихьа», – гъапнийи главайи.
М.Къурбановдин кьяляхъ диндин вакилар удучIвну гъулхнийи. Надир Зульфикьаровди гьаму деврин жямяаьтлугъдин уьмриъ Кьур’анди уйнамиш апIурайи роликан, Ансар Рамазановди ва Рягьим Рягьимовди – жигьиларин диндинна эдебнан тербияйикан, рягьимлувалин кюмекчи Гьяжимурад Гьяжиевди – терроризмйиз аькси профилактика гъабхбан важиблуваликан ктибтну.
Конкурсдин модератор райондин главайин диндин месэлйириан кюмекчи Надир Зульфикьаров вуйи. Дугъу конкурсдин гьарсар иштиракчийихьди Кьур’андин чаз ккуни маш гъядябгъну, гьадму урхуз гъитри гъахьну. Таж’виддин, махраждин ва утканди урхбан категорйириан жюрийи 15 баллин шкалайиан кьимат диврайи.
Натижайиъ конкурсдин бицIи-дарин дестейиъ Кьулиф гъул’ан вуйи Мустафа Сулейманов гъалиб гъахьну. Кьюбпи йишв Ляхя гъулан бай Суфьян Гьясанбеговди гъазанмиш гъапIну. Хъа шубубпи йишв’ина сабсдар баллар гъадагъу кьюр иштиракчи сатIиди удучIвну. Дурар Хюрикк гъул’ан Уьсман Жамалов ва Ккувлигъ гъул’ан Карим Гьяжимурадов вуйи.
Живанарин дестейиъ варитIан успагьиди Кьур’ан Ругуж гъул’ан вуйи Руслан Аьгьмадовди гъурхну. Кьюбпи йишв’ина ЧIвурдаф гъул’ан вуйи Мугьяммад Ражабов удучIвну. Шубубпи йишв Дагънийиан вуйи Мугьяммад Аьбдурягьмановди гъадабгъну.
Сабпи йишвар гъадагъдариз – Уьмрайиз (бицIи гьяж) путевка ва 50 агъзур манат, кьюбпи йишв гъазанмиш гъапIдариз – 30 агъзур манат, хъа шубубпи йишв’ина удучIвдариз 20 агъзур манат тувну. Мидланра гъайри, конкурсдин вари иштиракчйириз Кьур’андин китабар, гъудгникк ккирчрудар ва жара пешкешар багъиш гъапIну.
Конкурсдин кьяляхъ узу, конкурсдин жюрийин вакил, ислам диндин аьлим Ансар Рамазановдихъди сюгьбат гъубхнийза. Дугъан гафариинди, конкурс лап маракьлуди ва ужуб тешкиллувал ади кIули гъубшну.
«Конкурсдиъ иштирак гъахьи 60-рихьна бицIидар ва живанар ужуб гьязурвал айидар вуйи. Кьур’ан урхбаан вуйи конкурс райондин дережайиъди гъабхури сабпи раж ву. Хъа гъулариъ улихьнаси гьаму жюрейин конкурсар кIули гъухунча. Пуз ккундузузки, 17 йис’ина вуйи живанарин арайиъ Кьур’ан урхбаан ужудар натижйир а. Чпин хъуркьувалар дурари конкурсдиъра улупну. Гьацира райондин глава Мягьямед Къурбановди, учв улихь гьучIвну, конкурсдиз ужуб хъайивал гъапIну.
Пуз ккундузузки, Табасаран райондиъ хьадан тятIиларин вахтна вари гъуларин мистариъ бицIидариз аьраб чIалнан дарсар киври шубуд йис ву. Мисалназ, СиртIич гъулаъ цци хьадан вахтна 100-тIан артухъ бицIидариз ислам диндиан 5-6 мялимди дарсар киври гъахьну.
Гьаму конкурсдиъ бицIидарин дестейиъ сабпи йишв гъадабгъур Кьулиф гъулан имамдин бай ву. Думу гьаммишан дарсариз аьхю аьшкьниинди гъягъюра. Живанарин дестейиъ шубубпи йишв гъадабгъу Дагъни гъулан бали улихьна йисан чпин гъулаъ абццу цIийи мистаъ гьяфтайиъ шубуб ражари аьгъювалар гъадагъура. Дарсар пулсузди ву. Китабарра гъадагъуз мумкинвал адрудариз рягьимлувалин «Инсан» фонднан кюмек вуди тувра.
Мидланра гъайри, райондин ЖагътIил, Жулжагъ, Гурихъ ва жара гъулариъ мистаъ дарди жара хулариъ дишагьлийириз ва шубариз аьраб чIал кивра. Гьацдар мумкинвалар гъюру йисаз жара гъулариъра хьиди. Баярин арайиъ гъабхьибсиб конкурс шубарин арайиъра гъабхуз планарик кайич. Улихьнаси ЖагътIил гъулаъ шубарин ва баярин арайиъ сатIиди конкурс гъубхнийча. Гьадушваъ 8 шуру заан натижйир улупну. Янаки думу гъулаъ гъабхьи конкурсдин финализ миржир риш ва сар бай удучIвнийи.
Райондин дережайиъди вуйи конкурс, главайин гафариинди, давам хьибди. Гъюру йисан, ин ша Аллагь, думу хъана яркьуди гъабхидихьа», –гъапнийи Ансар Рамазановди.
