Мейлан Нежефов
«Гьациб гъуллугъ а – Ватан уьбхюб» – СССР-ин оборонайин министр Андрей Гречкойин му гафар Урусатдин Яракьлу кьувватариъ эскервалин буржи тамам апIурайидариз къанун вуди гъахьну.
Гьаму заан гъуллугънан сагьиб ватанпервервалин рякъ баркаллагьниинди кIули гъабхурайи полковник Роберт Мирзабегов гьаму йигъари инсафсуз уьзриан ихь арайиан гъушну.
Роберт 1971-пи йисан 29-пи декабриъ Хив райондиъ Хив гъулаъ Наврузбег ва Нурпери Мирзабековарин хизандиъ бабкан гъахьну. Улихь кьюр гъардаш, хъа кьяляхъ кьюр чи хъади, думу хизандиъ кьялану велед вуйи. Арха-бинайиинди дурарин абйир-бабар Мажвгул гъул’ан ву.
1975-пи йисан дурарин хизан Хив гъул’ан Дербент шагьриз кючмиш гъабхьну. Гьадму шагьрин 3-пи нумрайин мектеб ккудубкIбалан кьяляхъ Роберт 1989-пи йисан Новочеркасск шагьрин политехнический институтдик урхуз кучIвру. 1994-пи йисан институт ккудубкIу жигьилиз военный кафедрайин запасдиъ айи лейтенант кIуру ччвур тувнийи. Дугъу чан хушниинди ктабгъу рякъ’ан сабпи гамар 1995-пи йисан Мягьячгъала шагьриъ ерлешмиш дубхьнайи 102-пи бригадайин дестейиъ алдагънийи. Дестейин взводдин командирвалин вазифйир кIули гъахури, думу Чечен ва Дагъустан республикйирин аьтрафариин гъахьи дявйирин гьяракатариъ ва гьядисйириъ иштирак гъахьнийи.
Роберт Мирзабегов 2008-пи йисан Москвайиъ Фрунзейин ччвурнахъ хъайи академияйик урхуз кучIвру, ва 2010-пи йисан дугъу вуз заан хъуркьувалариинди ккудубкIуру. Академияйин кьяляхъ Санкт-Петербургдиъ ва Ленинград областдиъ жюрбежюр гъуллугъарихь лихури гъахьну. Хъа 2016-пи йисан думу направлениейиинди Коми Республикайин Сыктывкар шагьриз гьаънийи. Душваъ офицер сифте штабдин сарпи заместителди, хъасин начальникди тасдикь гъапIнийи.
Баркаллуди гъабхурайи ляхниъ дугъаз кьюбиб республикйирин терефнаан тувнайи пешкешарин, чухсагъул мялум апIбан кагъзарин, медаларин ва гьацира Урусатдин МВД-йин министрин ччвурнахъан вуйи сяътариинди, яракьариинди лишанлу дапIнайивалин сан-гьисаб адар.
1993-пи йисхъанмина уьмрин юлдаш Анжела Сяидмягьмадовнайихъди сатIиди айи дурариз кьисматну кьюр ришна сар бай тувнийи. Гьяйифки, веледар духьну, худлар ккарцру йигъар Робертдиз кьисмат гъабхьундар. 2023-пи йисан 26-пи сентябри гъагъи уьзри думу ихь арайиан гъухну.
Хизанди, багахьлуйири ва мирасари Ватан уьбхювалин буржи дугъан дамарариъ аьхю аба Наврузбегов Мирзабегхьан (хъа думу учв Ватандин Аьхю дявдин иштиракчи ву) вуйиб субут апIура. Дурариз сабсан ражну башсагълугъвал ва кIван сабур ккун апIураза.
